Ընդառաջելով իր էմիրաթցի պաշտօնակիցին հրաւէրը, հանրապետութեան նախագահ Ժոզէֆ Աուն երկօրեայ պաշտօնական այցելութեամբ ուղղուեցաւ Ապու Տապի, ընկերակցութեամբ արտաքին գործերու նախարար Եուսէֆ Ռաժիի: Ան էմիրաթցի բարձրաստիճան պատասխանատուներու հետ պիտի քննարկէ լիբանանեան զարգացումները, Էմիրութիւններուն հետ եղբայրական յարաբերութիւնները եւ համագործակութիւնը վերականգնելու հնարաւորութիւնները: Այցելութենէն առաջ տրուած հարցազրոյցի մը ընթացքին Աուն վերահաստատեց, որ լիբանանցիները յոգնած են պատերազմներէն եւ չեն ուզեր մագլցողական յայտարարութիւններ լսել: Ան փոխարէնը շեշտեց խնդիրները դիւանագիտական երկխօսութեամբ լուծելու հնարաւորութիւնը: «Հըզպալլայի զէնքին հարցով համաձայնութիւն կայ խորհրդարանի նախագահին հետ ու սկսած է այդ զէնքը վերահսկողութեան տակ առնելու արշաւը: Այժմ կը մնայ որոշումը գործադրել գետնի վրայ: Առաջնահերթութիւնը ծանր եւ միջին զէնքերու յանձնումն է, իսկ ինչ կը վերաբերի թեթեւ զէնքին, ապա այդ մաս կը կազմէ լիբանանեան մշակոյթին», ըսաւ նախագահ Աուն: Անոր համաձայն, լիբանանեան բանակը չէ ամբողջացուած տեղակայումը հարաւի մէջ՝ սահմանային դիրքերուն իսրայէլեան բռնագրաւումին պատճառով: Ան ժխտեց, որ Հըզպալլա արգիլած էր բանակին կողմէ իր դիրքերէն մէկուն խուզարկումը:
Խօսելով բարեկարգումներուն մասին, Աուն դիտել տուաւ, որ դրութեան կարգաւորումը արտերկրեայ պահանջ ըլլալէ առաջ լիբանանեան ներքին անհրաժեշտութիւն է: Նախագակը երէկ Պաապտայի մէջ ընդունեց Քուէյթի դեսպանատան գործակատարը, որ Աունին յանձնեց 1-12 Մայիսին Քուէյթ այցելելու հրաւէր:
