Նախանցեալ օր, որոշակի դադարէ ետք, իսրայէլեան օդուժը շարունակած էր զինադադարի խախտումները ու վերստին թիրախ մը հարուածած՝ Պէյրութի հարաւային արուարձաններու Հատաս շրջանին մէջ, պնդելով թէ կործանուած վայրը Հըզպալլային կողմէ գործածուող ենթակառոյց էր: Ծանր պայթումին նախորդեցին նախազգուշական երեք հարուածներ, մինչ իսրայէլեան բանակի բանբերը որոշ ժամանակ առաջ հրապարակած էր թիրախին քարտէզը, քաղաքացիներուն յորդորելով անյապաղ հեռանալ: Ուստի Հատասի եւ մօտակայ շրջաններուն մէջ նկատուեցաւ քաղաքացիներու տեղաշարժ եւ գլխաւոր ճամբաներու խճողուածութիւն: Իսկ քաղաքացիական պաշտպանութիւնը յայտարարեց, որ հարուածին հետեւանքով չէ եղած մարդկային վնաս: Ըստ տեղական լրատուամիջոցներուն, կործանուած մթերանոցը կը գործածուէր որպէս տեղահանուած քաղաքացիներուն տրամադրուելիք օգնութիւններու պահեստանոց:
Քաղաքացիական անվտանգութեան ծառայութիւնը այլ յայտարարութեամբ մը նշեց, թէ երկամսեայ պատերազմին վերջ տուած զինադադարի յայտարարութենէն ի վեր զանազան շրջաններէ յայտնաբերուած է 172 զոհի մարմին եւ աճիւն:
Արտաքին գործերու նախարարութիւնը դատապարտեց իսրայէլեան ոտնձգութիւնները եւ Պէյրութի հարաւային արուարձաններուն թիրախաւորումը: նախարարութիւնը զինադադարը երաշխաւորող միջազգային ուժերէն պահանջեց ճնշում բանեցնել Թել Աւիւի վրայ, որպէսզի վերջ դրուի յարձակումներուն:
