Հանրապետութեան նախագահ Ժոզէֆ Աուն յայտնեց, որ պետութեան տիրապետութենէն դուրս գտնուող զէնքի երեւոյթին վերջ դնելու որոշումը կայացուած է, աւելցնելով թէ արտօնուած չէ պատերազմական տրամաբանութեան վերադարձը: Պաապտայի մէջ ֆրանսական ծերակուտական պատուիրակութիւն մը ընդունած ատեն Աուն նշեց, որ սահմանային բռնագրաւեալ հինգ բլուրներէն իսրայէլեան նահանջը կրնայ արագացնել լիբանանեան բանակի տեղակայումը սահմանային գօտիին վրայ:
Խօսելով իսրայէլեան հետեւողական խախտումներուն եւ մասնաւորաբար Պէյրութի հարաւային արուարձաններու թիրախաւորումներուն մասին, Աուն Միացեալ Նահանգներուն, Ֆրանսային եւ զինադադարի գործադրութիւնը երաշխաւորող միջազգային միւս ուժերուն կոչ ուղղեց անյապաղ միջամտելու եւ վերջ տալու իսրայէլեան հարուածներուն: «Իսրայէլեան արարքները պիտի վտանգեն տարածաշրջանային կայունութեան հիմնասիւները եւ առաջնորդեն իսկական վտանգներու», ահազանցեց նախագահ Աուն:
Վարչապետ Նաուաֆ Սալամ, իր կարգին, զինադադարի համաձայնութիւնը երաշխաւորող միջազգային կողմերէն պահանջեց անյապաղ միջամտել՝ վերջ տալու իսրայէլեան խախտումներուն եւ արագացնելու իսրայէլացի զինուորներուն նահանջը Լիբանանի բռնագրաւեալ սահմանային բլուրներէն:
Միւս կողմէ, Իսրայէլի վարչապետ Պենիամին Նեթանիահու եւ պաշտպանութեան նախարար Իսրայէլ Քաց շեշտեցին, որ Պէյրութի հարաւային արուարձանները պիտի չդառնան Հըզպալլայի թաքստոց, Լիբանանի կառավարութիւնը պատասխանատու համարելով Հըզպալլայի գործունէութեան եւ սպառնալիներուն համար: Նեթանիահու յոխորտաց նաեւ, որ իրենք ծանր հարուած տուած են Հըզպալլային եւ ընդամէնը ժամերու ընթացքին կործանած են այն հրթիռային զինամթերանոցը, որ Հըզպալլա փորձած էր ամրացնել 30 տարի շարունակ:
