Փաղանգաւոր կուսակցութեան երեսփոխան Նետիմ Ժըմայէլի գլխաւորած պատուիրակութիւնը այցելեց Սոցիալ Դեմոկրատ Հնչակեան Կուսակցութեան կեդրոնատեղի, ուր տեսակցեցաւ Ս.Դ.Հ.Կ. Վարիչ մարմինին հետ, գլխաւորութեամբ ատենապետ ընկեր Վանիկ Տագէսեանի:
Ժողովականները քննարկեցին համատեղ հետաքրքրութիւն ներկայացնող նիւթեր՝ մասնաւորաբար քաղաքապետական ընտրութիւններու թղթածրարը եւ նախընտրական պատրաստութիւնները: Անոնք շեշտեցին քաղաքապետութիւններու դերը Պէյրութի եւ այլ շրջաններու բարեկարգումի եւ բարգաւաճումի գործին մէջ, ընդգծելով համագործակցութեան անհրաժեշտութիւնը հանուն պէյրութցիներու կենսամակարդակի բարձրացումին: Երկուստեք կարեւորուեցաւ մասնաւորապէս Պէյրութի եւ ընդհանրապէս բոլոր քաղաքապետութիւններուն մէջ յարանուանական հաւասար ներկայացուցչութեան պահպանումը:
Ժողովը առիթ էր միտքեր փոխանակելու լիբանանեան քաղաքական ընդհանուր զարգացումներուն շուրջ: Կողմերը համաձայնեցան մնալ մնայուն հաղորդակցութեան մէջ եւ շարունակել համագործակցութիւնը:
