Ապրիլի 24-ին՝ Հայոց ցեղասպանութեան սուրբ նահատակներու յիշատակի օրուան առիթով, Ն.Ս.Օ.Տ.Տ. Գարեգին Բ. ծայրագոյն պատրիարք եւ Ամենայն Հայոց կաթողիկոսի հանդիսապետութեամբ, Միածնաէջ Մայր Տաճարին մէջ մատուցուեցաւ Սուրբ եւ անմահ Պատարագ։ Այդ առիփով հաւատացեալներու խոնարհումին համար դուրս բերուած էր նաեւ Հայոց ցեղասպանութեան սրբոց նահատակաց մասունքարանը:
Պատարագիչն էր Մայր Աթոռ Սուրբ Էջմիածնի Գէորգեան հոգեւոր ճեմարանի ղեկավար Դանիէլ եպիսկոպոս Ֆընտըգեանը։
Պատարագի սրբազան արարողութեան ընթացքին Ամենայն Հայոց կաթողիկոսը իր հայրապետական ուղերձը յղեց համայն հայութեան: Ան նշեց, որ մեր սուրբ նահատակներուն յիշատակը կ’ազդարարէ մեզի հրատապութիւնը ազգային միասնականութեան։
Ան աղօթք վերառաքեց առ Աստուած եւ խնդրեց մեր սուրբ նահատակներուն բարեխօսութիւնը, որ մարդկութեան կեանքին մէջ տեղ չգտնեն եղեռնական ոճրագործութիւնները, եւ յարուցեալ Քրիստոսի շնորհքներուն ներքեւ խաղաղ ու ապահով ըլլան մեր հայրենիքն ու մեր ժողովուրդը ի սփւռս աշխարհի, եւ յոյսով ամուր ու սիրով միասնական՝ ի զօրու ըլլանք յաղթահարելու մեր առջեւ ծառացած բոլոր փորձութիւնները:
Սուրբ Պատարագի աւարտին եկեղեցականներու թափօրը, կրելով սուրբ նահատակներու մասունքարանը, ուղղուեցաւ դէպի Մայր Տաճարի շրջափակ, ուր Աղոթքի եւ ուխտի խաչքարին առջեւ, հանդիսապետութեամբ Ամենայն Հայոց կաթողիկոսին, կատարուեցաւ Հայոց ցեղասպանութեան սուրբ նահատակներու բարեխօսական կարգ:
