Երկուշաբթի, 14 Ապրիլ 2025-ին, հայ քաղաքական կուսակցութիւններու ներկայացուցիչները այցելեցին Ժեհթաուիի Հայ կաթողիկէ պատրիարքարան, ուր հանդիպում ունեցան Տանն Կիլիկիոյ կաթողիկէ հայոց Ռաֆայէլ Պետրոս ԻԱ. կաթողիկոս-պատրիարքին հետ։ Անոնք ներկայացուցին Հայոց ցեղասպանութեան 110-ամեակին առիթով կեդրոնական, երիտասարդական եւ հոգեւոր բնոյթի ձեռնարկներուն մանրամասնութիւնները։
Հոգեւոր տէրը ողջունեց կուսակցութիւններու ներկայացուցիչները եւ շեշտեց, որ Ապրիլ 24-ին առնչուած բոլոր ձեռնարկները պէտք է համակարգուած ըլլան՝ գնահատելով միասնականութեամբ ստեղծուած մթնոլորտն ու աշխատանքները։
Այս հանդիպումը նաեւ առիթ ծառայեց, որ խորհրդակցութիւններ ըլլան տարբեր երկիրներու մէջ, որոնց շարքին Վատիկանի, Ատրպէյճանի տարած դիւանագիտական, քաղաքական եւ քարոզչական աշխատանքներուն շուրջ։ Հոգեւոր տէրը յստակացուց, որ Հռոմի մէջ «Գրիգորեան» համալսարանին 10 Ապրիլին կազմակերպած այս վերջին բաւական աղմուկ հանած ձեռնարկը Ատրպէյճանի հերթական նենգափոխութիւնն է պատմական անհերքելի ճշմարտութիւններու: Թէ՛ Ընդհանրական եկեղեցին եւ թէ՛ անոր մաս կազմող Հայ կաթողիկէ եկեղեցին գործունեայ ընթացքով հաւատարիմ են այն նուիրական արժէքներուն, որոնք դարերու հոլովոյթով հայ քրիստոնեայ ազգը վկայած եւ ապրած է: Շեշտուեցաւ այդ ամբողջին մօտէն հետեւելու ու Պաքուի իշխանութիւններուն ծրագրերուն բուն նպատակները լաւապէս իմանալու եւ ըստ այնմ միասնական աշխատանքներ տանելու կարեւորութիւնը, առանց անհարկի մեղադրանքներու դիմելու եւ պառակտումի առաջնորդելու, որոնք կը կազմեն դիտաւորութիւնն ատրպէյճանական վարչակարգին։ Հոգեւոր տէրը աւարտին դարձեալ շեշտեց հոգեւոր, կուսակցական եւ համայնքային մակարդակներուն վրայ միասնական մարմիններով աշխատելու անհրաժեշտութիւնը։
