Վատիկանի քահանայապետը Քրիստոսի ներկայացուցիչն է երկրագունդի վրայ: Այդպէս հռչակած են իրենք զիրենք ու աշխարհով մէկ ընդունած:
Կար ժամանակ երբ երկինքի մէջ հողաշերտ կը ծախէին ու կտոր մը վկայագրի փոխարէն կը ստանային հսկայական գումարներ:
Պատմութիւնը կը շարունակէ կրկնել ինքզինք:
Բոլորս լաւ կը յիշենք, հազարաւոր հայորդիներու նահատակութեան պատճառ եղող Արցախի քառասունչորսօրեայ պատերազմին, մարդասիրական ոչ մէկ ակնարկութիւն եղաւ հայասէր կարծուած քահանայապետին կողմէ: Պատճառը ակնառու էր: Տէր եւ տիկին Ալիեւները միլիոնաւոր տոլարներ նուիրած էին Վատիկանին: Անգլերէն առածը կ’ըսէ. «Give me money, I say you honey»: Հայացնենք. «Դրամ տուր ինծի, մեղրս (շաքարս) ըսեմ քեզի»:
Վերջերս, Հայ Առաքելական Եկեղեցին (իր զոյգ գահակալներով) ԽՍՏԻ՛Ւ այպանեց, Վատիկանի մէջ միակողմանի կազմակերպուած «Քրիստոնէութիւնը Ատրպէյճանի մէջ» թեմայով գումարուող համագումարը:
Ատրպէյճան եւ քրիստոնէութիւն, առանց Հայ եկեղեցւոյ ներկայութեա՞ն… հա՜…հա՜… «խնդամ ալ պարապի չերթայ» պիտի ըսէր ժողովրդական ասացուածքը:
Ի բացառեալ Ամերիկայի Միացեալ Նահանգներէն, աշխարհով մէկ թապու է կղերականներուն դէմ խօսիլը, իսկ Լիբանանի մէջ՝ քրէական յանցանք: Թէ՛ մեր ընտանիքին եւ թէ՛ անհատական կեանքին մէջ կաթոլիկ կղերականներուն հետ եղած գայթակղութիւններուն մասին խօսելով դատարան երթալու կամ բանտարկուելու պատրաստակամութիւն չունինք: Ներող եղէք:
Պիտի համարձակինք միայն օրինակ մը բերել Ամերիկայի Միացեալ Նահանգներէն, ուր, բացի՛ Իսրայէլի գործած ոճիրներէն, ազատ էք քննադատելու նոյնիսկ օրուան նախագահը:
Մանրամասնեմ օրինակը:
Ամերիկեան հետախուզական գրասենեակի (FBI) գլխաւոր տնօրէններէն մին՝ Ռոպըրթ Ֆիլիփ Հանսըն, կը նկատուի ամէնէն վտանգաւոր երկկողմանի գործակալը FBI-ի ամբողջ պատմութեան մէջ: Դաւաճանելով իր երկրին, երկար տարիներ գործակցած է նախ սովետ եւ ապա ռուս հետախոյզներուն հետ: Մատնած ռուսական շահերուն դէմ գործող անձերը եւ պատճառ դարձած է տասնեակներու սպանութեան կամ գնդակահարման:
Հանսըն եղած է կաթոլիկ եկեղեցւոյ հաւատարիմ եւ նուիրեալ հաւատացեալներէն մին: Անդամ ըլլալով OPUS DEI ծայրայեղ կաթոլիկ կազմակերպութեան, ներկայ եղած է ամէնօրեայ պատարագի, հետեւաբար ալ շատ մտերիմը՝ ծխատէր քահանային:
Մինչեւ ձերբակալութիւնը, իր դաւաճանութենէն տեղեակ եղած են միմիայն իր կողակիցն ու քահանան՝ Հայր Ռոպերթ Պուչչարելլի:
Աւելի քան քսան տարի, Քրիստոսի ներկայացուցիչին ենթակայ կղերականը խրատած է Հանսընը, որ առ երես չգայ իր պետութեան հետ, բայց փոխարէնը ռուսերէն ստացած միլիոնաւոր տոլարները եկեղեցիին նուիրէ, որպէսզի մեղքերը քաւուին:
Վստահ իր օրերուն այնքան շատ էին նման սքեմաւորները, որ Տոսթոյեւսքին իր «Գարամազով եղբայրները» գիրքին մէջ կ’ըսէ. «Ամենեւին եկեղեցիներ չկան այլեւս, այլ մնացած են միայն եկեղեցականներ եւ եկեղեցիներու հոյակապ շէնքեր»:
Երկու հազար տարի առաջ, Յուդայի ստացածը 30 արծաթ էր: Այսօրուայ Քրիստոսի ներկայացուցիչներունը՝ միլիոնաւոր տոլար:
ՊԵՐՃ ԱՐԱՊԵԱՆ
