Իր արտերկրեայ այցելութիւններուն ծիրին մէջ, հանրապետութեան նախագահ Ժոզէֆ Աուն երէկ այցելեց Տոհա, ուր տեսակցեցաւ Քաթարի Թամիմ պըն Համատ ալ Սէնի իշխանին հետ եւ քննարկեց երկկողմանի եղբայրական յարաբերութիւններն ու համագործակցութեան միջոցները: Կարեւորելով լիբանանեան բանակին դերակատարութիւնը, իշխանը յայտնեց զինուորներու աշխատավարձերուն աջակցելու նպատակով տրամադրուած նպաստը աւելցնել 60 միլիոն տոլարով եւ բանակին տրամադրել 162 մեքենայ եւս, որպէսզի զինուորները կարենան պահպանել երկրին կայունութիւնը եւ զսպել սահմանը: Թամիմ պըն Համատ կարեւորեց 1701 բանաձեւին գործադրութիւնը եւ Լիբանանի բոլոր շրջաններուն մէջ բանակին հեղինակութեան ամրապնդումը: Ան զօրակցեցաւ Լիբանանի գերիշխանութեան եւ տարածքային ամբողջականութեան:
Երկու ղեկավարները որոշեցին մնայուն կերպով խորհրդակցիլ եւ աւելի զարգացնել բոլոր ոլորտներուն մէջ առկայ կապերը: Անոնք երկու երկիրներուն զօրակցութիւնը յայտնեցին պաղեստինցիներու արդար իրաւունքներուն՝ ընդ որում պաղեստինեան պետութիւն ունենալու ձգտումին, ինչպէս նաեւ պահանջեցին գործադրել միջազգային բոլոր օրէնքներն ու խաղաղութեան արաբական նախաձեռնութիւնը: Աուն եւ իշխան Թամիմ աջակցութիւն յայտնեցին Սուրիոյ ամբողջականութեան, գերիշխանութեան եւ անկախութեան: Աուն շնորհակալութիւն յայտնեց Քաթարի շարունակական զօրակցութեան համար:
