Լիբանանեան բանակի հրամանատարութիւնը յայտարարեց, թէ 22 եւ 28 Մարտին հարաւէն պաղեստինեան գրաւեալ հողերուն ուղղութեամբ հրթիռարձակումի հետաքննութեան արդիւնքով կարելի եղած է ճշդել շարք մը կասկածելիներու ինքնութիւնը, իսկ անցնող օրերուն լիբանանեան զանազան շրջաններու մէջ կատարուած խուզարկումներով ձերբակալուած են շարք մը լիբանանցիներ եւ պաղեստինցիներ: Գործողութեան ընթացքին բանակն ու ապահովական ուժերը գրաւած են նշեալ կասկածելիներուն գործածած զէնքերը եւ հրթիռարձակումի սարքերը, զանոնք յանձնելով դատական առնչակից կառոյցներուն:
