Ուրախութեամբ եւ խորին ակնածանքով կը շնորհաւորենք մեր սիրելի ՀՈԳԵՇՆՈՐՀ ՏԷՐ ԱԲՐԱՀԱՄ ԱԲԵՂԱՅ ՃՈՒԼՖԱՅԵԱՆը, իր առաջին Սուրբ Պատարագին, քարոզին եւ անոր յաջորդած սուրբ շքերթին առիթով։
Ծաղկազարդի Կիրակին կը նկատուի ոչ միայն փուլ մը հայր սուրբին հոգեւոր ուղիին մէջ, այլ նաեւ իբրեւ շնորհքներով լեցուն պահ մը մեզ բոլորիս համար, յատկապէս այն բարեպաշտ հաւատացեալ բազմութեան, որոնք վկայ դարձան անոր նուիրումին, խոնարհութեան եւ Եկեղեցւոյ հանդէպ ունեցած սիրոյն։ Հայր սուրբին առաջին քայլերը սուրբ սեղանին մօտ, անոր պատգամները, առաջնորդութիւնը սուրբ թափօրի ընթացքին՝ կ’արտացոլէին Տէր Աբրահամի խոր արմատներ ունեցող հաւատքն ու բոլորս ներշնչող անոր ծառայելու ոգին։
Եկեղեցին, որ ընտրեց այս սուրբ եւ բերկրալի օրուան համար, օտար վայր մը չէր Հայր սուրբին համար։ Ընդհակառակը՝ ան եղած է իր հոգեւոր տունը տարիներ շարունակ՝ լի աղօթքներով, յիշողութիւններով եւ անոր մանկութեան ու պատանեկութեան ժամանակներու մխիթարիչ ներկայութեամբ։ Այս ծանօթ շրջապատը եղաւ իտէալական հիմք մը՝ Հայր սուրբի առաջին պատարագը մատուցելու համար։
Թող ձիթենեաց ճիւղերով Հայր Աբրահամի նորագոյն ծառայութիւնը միայն սկիզբը ըլլայ անսպառ շնորհքներու: Կը մաղթենք որ ան միշտ հաւատքով ընթանայ, խոնարհութեամբ առաջնորդէ եւ ուրախութեամբ ծառայէ։ Թող անոր եկեղեցական ուղին լուսաւորուի շնորհքով եւ արգասաբեր ըլլայ լիբանանահայութեան համար։
