«Ռոյթըրզ» լրատու գործակալութիւնը հաղորդեց, թէ Սէուտական Արաբիոյ իշխանութիւնները կը մտադրեն Միջազգային դրամատան վճարել Սուրիոյ պարտքերը, որպէսզի Դամասկոս կարողութիւն ունենայ նոր վարկեր եւ յաւելեալ աջակցութիւն խնդրելու դրամատունէն: Այսուհանդերձ, ոչ Ռիատ, ոչ Դամասկոս, ոչ ալ դրամատունը հաստատեցին կամ ժխտեցին նշեալ տեղեկութիւնը:
Իսկ Եւրոմիութեան արտաքին քաղաքականութեան յանձնակատար Քայա Քլաս յայտնեց, թէ Սուրիոյ իրավիճակը բարեկարգելու վերաբերեալ նոր իշխանութիւններէն տակաւին զգալի քայլեր չեն նկատած, ուստի երկրին վիճակը տակաւին փխրուն է: Զօրակցելով հանդերձ «Իսրայէլի ինքնապաշտպանութեան իրաւունքին», եւրոպացի պաշտօնատարը ահազանգեց, որ Թել Աւիւ այժմ կը հատէ համաչափ ինքնապաշտպանութեան սահմանը, կոչ ուղղելով վերականգնելու գերիներու ազատ արձակումին եւ պարերազմի դադրեցումին միտող բանակցութիւնները:
