Ամերիկեան Սպիտակ տունը դրական որակեց Թեհրանի եւ Ուաշինկթընի միջեւ Օմանի մէջ կայացած բանակցութիւնները, աւելցնելով որ համաձայնութիւն գոյացած է բանակցային երկրորդ փուլ մը կազմակերպել յառաջիկայ Շաբաթ օր: Ըստ ամերիկեան նախագահութեան, երկու երկիրներու պատուիրակներուն միջեւ կայացած ուղիղ շփումը կը համարուի յառաջընթաց: «Մեր պատգամը այն է, որ նախագահ Տոնըլտ Թրամփ կը նախընտրէ դիւանագիտական լուծումը», յայտարարեց ամերիկեան նախագահութիւնը: Թրամփ նախապէս վստահեցուցած էր, թէ պիտի լուծէ Իրանի հարցը, շեշտելով որ Թեհրան չի կրնար ունենալ հիւլէական զէնք:
Իրանի արտաքին գործերու նախարար Ապպաս Արաղճի իր կարգին յայտնեց, որ ամերիկեան կողմին հետ բանակցութիւնը եղած է կառուցողական եւ դրական: Ըստ նախարարին, ամերիկեան եւ իրանեան պատուիրակութիւնները կարճատեւ հանդիպում ունեցած են Օմանի մէջ, սակայն անուղղակի բանակցութիւններու աւարտին:
