Տնտեսութեան նախարար Ամէր ալ-Պիսաթ ըսաւ, թէ լիբանանցի աւանդատէրերը աստիճանաբար պիտի վերատիրանան իրենց դրամատնային գումարներուն՝ որպէս Լիբանանի մէջ ելեւմտական ամբողջական բարեկարգումներու անքակտելի մասնիկ: Ըստ նախարարին, ոեւէ աւանդատէր պիտի չկորսնցնէ խնայած դրամը, սակայն այդ կրնայ որոշ ժամանակի կարօտիլ: Պիսաթի խօսքով, դրամատնային գաղտնապահութեան օրէնքը մշակուած է եւ շուտով պիտի վաւերացուի խորհրդարանին մէջ, հնարաւորութիւն տալով աւելի լաւ ըմբռնելու իւրաքանչիւր դրամատան դրութիւնը: Ան սակայն մտավախութիւն յայտնեց, որ համաշխարհային ելեւմտական եւ տնտեսական լարուածութիւնը կրնայ իր ժխտական ազդեցութիւնը ունենալ արտերկրի լիբանանցիներուն հայրենիք ուղարկած գումարներու ծաւալին վրայ:
