Հանրապետութեան նախագահը հաւաստիացուց, թէ Լիբանանի մէջ սկսած է բարեկարգումներու ծրագրի գործադրութիւնը, որովհետեւ այդ ուղեգիծը նախ լիբանանեան կարիք մըն է, արտաքին պահանջ ըլլալէ առաջ: Ամերիկեան ծերակուտական պատուիրակութիւն մը ընդունած ատեն Աուն դիտել տուաւ, որ կառավարութիւնը իր աշխատանքային 8 շաբթուան ընթացքին արդէն իսկ հասած է որոշ իրագործումներու:
Խօսելով հարաւի վիճակին մասին, Աուն վստահեցուց, որ լիբանանեան բանակը իր պարտականութիւնները կը կատարէ սահմանամերձ այն շրջաններուն մէջ, ուրկէ նահանջած են իսրայէլեան ուժերը: «Բանակը կը գործադրէ 1701 բանաձեւը եւ կը գրաւէ ապօրինի զէնքերը, ապացուցելով որ իրապէս կարողութիւն ունի պաշտպանելու քաղաքացիները», շեշտեց նախագահը: Ան յայտնեց, որ աշխատանք պիտի տարուի քաղաքացիներուն պաշտօնական փաստաթուղթերը ելեկտրոնային միջոցներով իրականացնելու ուղղութեամբ: Աունի համաձայն, լիբանանեան բանակը հարաւային շրջանին մէջ կը կազմալուծէ գետնափոր ուղիներ եւ կը գրաւէ զէնք ու զինամթերք, իսկ Հըզպալլա չ’ընդդիմանար այդ գործողութիւններուն:
