Սէուտական Արաբիոյ արտաքին գործերու նախարար Ֆայսալ պըն Ֆարհան պահանջեց անյապաղ վերականգնել Կազայի զինադադարը եւ վերջ տալ պաղեստինցի քաղաքացիներու թիրախաւորումին, ահազանգելով թէ մարդասիրական օգնութիւններու Կազա մուտքը պէտք չէ պայմանաւորուի ապահովական վերականգնումին, այլ անհրաժեշտ է օգնութիւնը իսկոյն փոխանցել պաշարուած քաղաքացիներուն, որոնք կը դիմագրաւեն բազմաթիւ վտանգներ: Ան կտրականապէս մերժեց Կազայի բնակչութեան որեւէ պատճառով եւ ուղղութեամբ տարհանումը:
Իսկ Թուրքիոյ նախագահ Ռեճեպ Թայիպ Էրտողան բողոքեց, թէ աշխարհը ՄԱԿ-ի Ապահովութեան խորհուրդի անդամ հինգ պետութիւններէն մեծ է, մարդասիրութիւնն ալ անոնցմէ վեհ է: «Մենք կը նախընտրենք հակամարտութիւնները լուծել երկխօսութեամբ եւ համաշխարհային խիղճով», ըսաւ Էրտողան, Անթալիոյ մէջ գումարուած դիւանագիտական համաժողովին ընթացքին: Ան Իսրայէլը որակեց «ահաբեկչական պետութիւն մը, որ մէսուկէս տարիէ ցեղասպանութեան կ’ենթարկէ Կազայի բնակչութիւնը, անտեսելով միջազգային եւ մարդասիրական բոլոր սկզբունքները»: Ան բոլոր երկիրներէն պահանջեց լուռ չմնալ պաղեստինցի քաղաքացիներուն նտատմամբ գործուած կորորածներուն դիմաց, այլ իսկոյն դատապարտել անոնց նկատմամբ գործուած ոճիրները: Էրտողան նաեւ Իսրայէլը զգուշացուց Սուրիոյ անվտանգութիւնը խաթարելու իսրայէլեան փորձերէն, շեշտելով թէ Սուրիա պէտք է մնայ ապահով եւ կայուն: «Որեւէ կողմի չենք արտօներ վտանգել Սուրիոյ ապահովութիւնը եւ կայունութիւնը», պնդեց Թուրքիոյ նախագահը:
