Պէյրութի նաւահանգիստի պայթումէն անցած է գրեթէ հինգ տարի: Թղթածրարը հետաքննող դատախազ Թարէք Պիթար վերջերս շարունակեց աշխատանքը եւ հարցաքննութիւններու շարքը: Պիթար երէկ իր գրասենեակին մէջ ընդունեց Ընդհանուր անվտանգութեան ծառայութեան նախկին ընդհանուր տնօրէն զօրավար Ապպէս Իպրահիմը եւ զայն հարցաքննեց նաւահանգիստի պայթումին առնչութեամբ: Իպրահիմ յայտնեց, թէ ժամանած է հարցաքննութեան՝ ապացուցելու, որ դատախազ Պիթարի նկատմամբ ներկայացուցած հայցը նպատակ չի հետապնդեր խափանել հետաքննութեան ընթացքը: Աւելի ուշ, Պիթար հարցաքննեց նաեւ Պետական անվտանգութեան ծառայութեան նախկին ընդհանուր տնօրէն զօրավար Թոնի Սալիպան: Վերջինս յայտնեց, որ նիստը ընթացած է շատ հանդարտ եւ դրական մթնոլորտի մէջ:
Նշենք, որ իրենց պաշտօնավարութեան ժամանակաշրջանին, զօրավարներ Իպրահիմ եւ Սալիպա ստանձնած էին ապահովական մեծ պարտականութիւններ, նոյնիսկ հատելով Լիբանանի սահմանը եւ համակարգողի ու միջնորդի դեր ստանձնելով Սուրիոյ մէջ:
Երկրին կայունութիւնը ամրապնդելու եւ գաղթակայաններուն անվտանգութիւնը պահպանելու նպատակով, լիբանանեան բանակէն ջոկատ մը հետախուզական ծառայութեան աջակցութեամբ խուզարկումներ կատարեց Պեքաայի Թայպէ գիւղին մերձակայ սուրիացիներու գաղթակայանին մէջ: Առանց միջադէպերու ընթացած գործողութեան ընթացքին յայտնաբերուեցան հրաձիգներ եւ ապօրինի նիւթեր, որոնք խուզարկող խումբը գրաւեց եւ փոխադրեց բանակի մօտակայ զօրամաս:
