Հանրապետութեան նախագահ Ժոզէֆ Աուն երէկ չյայտարարուած անակնկալ այցելութիւն տուաւ ինքնաշարժներու գրանցումի կեդրոն, ուր հետեւեցաւ աշխատանքներու ընթացքին եւ այդ ենթակառոյցին երկարատեւ խնդիրներուն, որոնք կը դժուարացնեն քաղաքացիներուն գործերը: Պաշտօնեաներուն հետ զրոյցին ընթացքին նախագահը զգուշացուց, թէ փտածութեան երեւոյթը քօղարկողը կը համարուի փտածներու գործընկեր, պետական պաշտօնեաներուն կոչ ուղղեց կառավարութեան աչքը ըլլալու պետական հաստատութիւններուն մէջ: Նախագահը աւելի ուշ այցելեց նաեւ Պէյրութի նաւահանգիստ ու հետեւեցաւ մաքսային ծառայութեան ու ապահովական կեդրոններու աշխատանքին:
Իսկ ուժանիւթի նախարար Ճօ Սատի երէկ այցելեց Ելեկտրականութեան հաստատութեան Մար Մխայէլի կեդրոնատեղին, ուր հետեւեցաւ աշխատանքային ծանր պայմաններ դիմագրաւող պաշտօնեաներու գործին: Հաստատութեան ընդհանուր տնօրէն Քամալ Հայէք Սատին տեղեկացուց, թէ շուտով պիտի կայանայ հաստատութիւնը վերանորոգելու նուազուրդը:
