Վարչապետ Նաուաֆ Սալամ տեսակցեցաւ մարոնիներու կարտինալ Պըշարա Ռահի պատրիարքին հետ եւ քննարկեց լիբանանեան զարգացումները: «Պատրիարքին հետ խօսեցայ կառավարութեան անցնող շաբաթներու աշխատանքին մասին ու հպարտ եմ մեր իրագործումներով», ըսաւ Սալամ՝ աւելցնելով, որ Ռահիին ներկայացուցած է ամերիկացի պատուիրակի տեղակալ Մորկըն Օրթէյկըսի հետ քննարկումներուն բովանդակութիւնը եւ քաղաքապետական ու թաղապետական ընտրութիւններուն նախապատրաստութիւնները: «Պէյրութի քաղաքապետական ընտրութիւնները պէտք է արտացոլեն Լիբանանի հաւասար բաժնեկցութեան եւ բազմազանութեան դիմագիծը», շեշտեց Սալամ: Ըստ վարչապետին, պետութեան հեղինակութեան ամրապնդումը եւ ապօրինի զէնքին թղթածրարը շուտով պիտի դրուին կառավարութեան սեղանին վրայ:
