Միացեալ Նահանգներու նախագահ Տոնըլտ Թրամփի սահմանած լայնածաւալ տուրքերու եւ մաքսավճարներուն հետեւանքները սկսած են մէկ առ մէկ յայտնուիլ: Անցնող երեք օրերուն ցնցումներ եւ խուճապահար իրավիճակ կը պարզուի ելեւմտական կեդրոններուն եւ սակարաններուն մէջ՝ Միացեալ Նահանգներէն ծայրագոյն արեւելք, անցնելով Եւրոպայէն ու Միջին Արեւելքէն: Երէկ 16 տարիէ ի վեր վատագոյն օրն էր Հոնկ Քոնկի սակարանին համար, ուր գրանցուեցաւ 12 առ հարիւրի նահանջ: Թոքէոյի սակարանը փակեց 7,8 առ հարիւրի նահանջով, իսկ Սէուլի սակարանը՝ 5,6 առ հարիւրի: Նիւ Եորքի սակարանն ալ բացաւ երեք առ հարիւրի նահանջով: Ամերիկեան Թեքսասի հում քարիւղի տակառին գինը նուազեցաւ չորս տարիէ իր վատագոյն սահմանին՝ նուազ քան 60 տոլարի, իսկ Ծոցի արաբական երկիրներուն մէջ նկատուեցաւ սակարաններու գործունէութեան նահանջ՝ միջազգային ելեւմտական հաւանական ճգնաժամի մտավախութեամբ:
