Իրանի նախագահ Մասուտ Փեզեշքեան Ուաշինկթընին կոչ ուղղեց ապացուցելու, որ իսկապէս կը ձգտի բանակցելու Թեհրանի հետ: «Մենք կը հաւատանք բանակցութեան գաղափարին եւ կը ձգտինք անոր, նաեւ կը մերժենք տիրանալ հիւլէական զէնքի: Չենք ուզեր պատերազմներ եւ ճգնաժամեր», վստահեցուց նախագահը, սակայն մերժեց բանակցիլ ճնշումի տակ:
Իսկ արտաքին գործերու նախարար Ապպաս Արաղժի կտրականապէս մերժեց ուղղակի բանակցիլ ամերիկացիներուն հետ, փոխարէնը առաջարկելով Օմանի միջորդութեամբ անուղղակի բանակցութիւններ: «Մենք այս առումով չենք աճապարեր, իսկ գնդակը այժմ ամերիկացիներուն մօտ է», ըսաւ նախարարը:
