Ներքին գործերու նախարար Ահմատ Հաժժար իր գրասենեակին մէջ գումարեց ապահովական ժողով մը՝ քննարկելու համար Պէյրութի միջազգային օդակայանին ապահովական վիճակը, քանի մը օր առաջ մեկնումի սրահին մէջ ուղեւորներու մասնակցութեամբ տեղի ունեցած հաւաքական ծեծկռտուքի լոյսին տակ, որուն տեսագրութիւնները արագ տարածուեցան համացանցի վրայ: Ժողովին ներկայ եղան օդակայանի անվտանգութեան ծառայութեան պետ զօրավար Ֆատի Քֆուրին եւ ներքին ապահովութեան ուժերու, ընդհանուր անվտանգութեան եւ մաքսային ծառայութիւններու համապատասխան ճիւղերուն պատասխանատուները: Ժողովականները արծարծեցին օդակայանին մէջ ի գործ դրուած ապահովական ծրագիրը եւ խճողուածութիւնը կանխելու միջոցները՝ մանաւանդ զբօսաշրջային եղանակի սեմին: Նախարար Հաժժար անդրադարձաւ վերջին միջադէպին եւ տեղեկացուց, որ թղթածրարը արդէն փոխանցուած է դատական առնչակից մարմիններուն եւ կը կատարուի քննութիւն՝ պարզելու համար տեղի ունեցածին բոլոր ծալքերը:
