Լիբանանի Թէքէեան մշակութային միութեան Տեղական վարչութեան կազմակերպութեամբ, Ուրբաթ, 4 Ապրիլի երեկոյան, «Թէքէեան» կեդրոնին մէջ հաճոյքը ունեցանք վայելելու բանաստեղծներու իշխան Վահան Թէքէեանի մահուան 80-ամեակին նուիրուած երեկոն: Անմիջապէս յայտնենք, որ ձեռնարկը իր կազմակերպչական, գեղարուեստական եւ նամանաւանդ բանախօսական մակարդակներով ներկաներուն փոխանցեց բարձրորակ գրական մշակութային բերկրանքի յոյզեր:
Ողջոյնի խօսքը կատարեց օրդ. Քարեն Բարսեղեանը: Խոստումնալից օրդ. Վարդի Սալխանեան ասմունքեց բանաստեղծին քերթուածներէն։ Տիար Աւետիս Տիպան կարդաց Թէքէեանի խմբագրած յօդուածներէն: Ապա, ան հրաւիրեց օրուան բանախօս՝ «Խօսնակ» պաշտօնաթերթի խմբագիր, բանաստեղծ, արձակագիր եւ հրապարակագիր տիար Համբիկ Մարտիրոսեանը: Յարգելի բանախօսը հանգամանօրէն դասախօսեց մեծանուն Վահան Թէքէեանի կեանքին ու գրական գործունէութեան մասին, շուրջ կէս ժամ դէպի ամբիոնը կեդրոնացած պահելով ունկընդիրը: Պարոն Մարտիրոսեանը Վահան Թէքէեան բանաստեղծը հմտօրէն ներկայացնելէ աւելին կատարեց՝ ներկաներուն հրամցնելով գիտական աշխատասիրութիւն մը՝ զայն գեղեցկաբար մերթ ընդ մերթ Թէքէեանի քերթուածներէն մասունքներով համեմելով, իսկ «Մէկ Հատիկս» գոհարը յուզախառն վարպետութեամբ՝ եզրափակիչ խօսքի որպէս ամփոփում:
Աւարտին, տիկ. Միրէյ Քիւթիւկճեան քնքշօրէն մեներգեց «Եկեղեցին Հայկական»ը, երգեհոնահար տիկ. Մարալ Թալաթինեանի ընկերակցութեամբ: Երաժշտական ձայնաւորման ինչպէս նաեւ յայտագրի գործադրութեան ղեկավարն էր վաստակաշատ երաժիշտ, սաքսոֆոնահար տիար Վիգէն Չալեանը։
Վահան Թէքէեանի մահուան 80-ամեակին նուիրուած սոյն գնահատելի ձեռնարկով թէքէեանցիները անգամ մը եւս պատուեցին մեծարժէք բանաստեղծը, անոր յիշատակին շնորհելով համապատասխան արժեւորում:
