Հանրապետութեան նախագահ Ժոզէֆ Աուն յայտնեց, որ զինեալ կազմակերպութիւններ կամ զէնքեր պիտի չմնան պետութեան հեղինակութենէն դուրս, հաւաստիացնելով որ շուտով աշխատանք պիտի տարուի մշակելու ազգային անվտանգութեան ռազմավարութիւնը, որմէ պիտի բխի ազգային պաշտպանութեան ռազմավարութիւնը: Նախագահը նշեց, թէ Լիբանանի մէջ խնդիրները կարելի է լուծել միայն երկխօսութեան եւ հետեւողական հաղորդակցութեամբ: Պաապտայի պալատ այցելած ամերիկեան պատուիրակութեան հետ տեսակցած ատեն նախագահը յանձնառութիւն յայտնեց ՄԱԿ-ի 1701 բբանաձեւի գործադրութեան եւ շնորհակալութիւն յայտնեց ԵՈՒՆԻՖԻԼ-ի խաղաղապահ ուժերուն: Ան բացատրեց, թէ բանակը Լիթանի գետէն հիւսիս փակած է պաղեստինեան զինեալ կազմակերպութիւններուն պատկանող վեց կեդրոն եւ գրաւած կամ կործանած է զինամթերանոցներուն պահեստները:
Հիւր պատուիրակութեան նախագահ Էտուարտ Կապրիէլ շեշտեց Հըզպալլան ապազինելու եւ արմատական բարեկարգումներ գործադրելու անհրաժեշտութիւնը, որպէսզի Լիբանան ստանայ միջազգային ընտանիքին նիւթական աջակցութիւնը: Դրուատելով նախագահ Աունին եւ լիբանանեան բանակին դերակատարութիւնը, Կապրիէլ յայտնեց, թէ ամերիկեան գոնկրէսին մէջ կը քննարկուին Լիբանանին աջակցելու միտող օրինագիծեր:
Նախագահ Ժոզէֆ Աուն երէկ ընդունեց նաեւ խորհրդարանի նախագահ Նեպիհ Պըրրին, որուն հետ քննարկեց երկրին ընդհանուր վիճակը՝ ներառեալ հարաւի զարգացումները եւ Միջին Արեւելքի մէջ Միացեալ Նահանգներու յատուկ պատուիրակի օգնական Մորկըն Օրթէյկըսի այցելութեան արդիւնքները: Նշենք, որ Պէյրութ այցելելէ եւ պաշտօնատարներուն հետ տեսակցելէ ետք Օրթէյկըս յայտնեց, որ չէ առաջարկած Իսրայէլի հետ յարաբերութիւններու բնականոնացում, այլ մաղթած է, որ Լիբանանի մէջ անյապաղ ապազինուին բոլոր միլիսները՝ ներառեալ Հըզպալլան:
