Անցեալ Շաբաթ օր, 29 Մարտին, հաճոյքն ունեցանք ընդունելու փափկավարական այցելութիւնը լիբանանահայ մտաւորական, «Զարթօնք» օրաթերթի նախկին խմբագրապետ, հրապարակագիր, դասախօս, մանկավարժ, ազգային-կուսակցական գործիչ, բանասէր եւ գիրքերու հեղինակ Պարոյր Աղպաշեանի:
Յարգելի հիւրին հետ մեր ունեցած ազգային-հայրենական կեանքը յուզող հարցերու շուրջ հաճելի եւ շահեկան զրոյցին ներկայ էր նաեւ Ս.Դ.Հ.Կ.ի Լիբանանի Շրջանի Վարիչ մարմինի մամլոյ դիւանապետ ընկեր Գէորգ Տաղլեանը:
Փորձառու մտաւորականին հետ կիսեցինք այն մտահոգիչ խնդիրները, որոնք ծառացած են հայութեան առջեւ ընդհանրապէս եւ լիբանանահայութեան առջեւ՝ մասնաւորապէս: Խօսակցութեան հրատապ նիւթերէն էր նաեւ նոր սերունդին անտարբերութիւնը, ուծացման երեւոյթն ու հետաքրքրութեան պակասը ազգային-մշակութային իրադարձութեանց նկատմամբ: Անշուշտ, այս ծիրէն ներս, ուշադրութիւն կեդրոնացուցինք հայ մամուլի պարզած վիճակին, դժուարութեանց, ուր սկսած են ի յայտ գալ անմխիթար երեւոյթներ: Հակառակ այս բոլորին, հայրենական թէ լիբանանեան, ազգային թէ գաղութային հարցերու հանդէպ մեր հետեւողական վճռականութիւնն ու լաւատեսութիւնը կը մնան անհրաժեշտ: Միասնաբար մտահոգութիւն յայտնեցինք լիբանանահայ մարդուժին նօսրացման ի տես, արտագաղթին եւ ազգային կեանքին հետզհետէ գունաթափումին փաստին դիմաց:
Սիրալիր եւ անկեղծ մթնոլորտի մէջ ընթացած մեր ջերմ հանդիպումը մաղթեցինք որ ըլլայ պարբերական եւ մղիչ խթան մը առաւել համագործակցութեան, հաստատելով որ աւելի լայն կերպով ուժերու մէկտեղումն ու գործակցութիւնը կրնան դառնալ օգտաւէտ եւ օրինակելի:
