Շարունակելով իր տնտեսական ու ելեւմտական կոշտ քայլերը, Միացեալ Նահանգներու նախագահ Տոնըլտ Թրամփ յայտնեց արտերկրի նկատմամբ մաքսային տուրքեր սահմանելու մասին: Ան ապա շեշտեց, որ այժմ պահը յարմար է նուազեցնելու տոկոսներուն թիւը: Միւս կողմէ, ամերիկեան դաշնակցային պահեստի նախագահ Ժերոմ Փաուլ յայտնեց, որ Թրամփի տուրքերը հաւանաբար յառաջիկայ ամիսներուն պիտի բարձրացնեն ուռճացումի ցուցանիշը, յառաջացնեն գործազրկութեան վտանգ եւ աւելի դանդաղ աճ: Փաուլ նաեւ շեշտեց, որ առայժմ անփոփոխ պիտի պահէ տոկոսներուն համեմատութիւնը: Թրամփի քայլերուն իսկոյն հակադարձեց Չինաստան եւ 34 առ հարիւրի տուրք սահմանեց ամերիկեան արտադրանքին նկատմամբ: Իսկ Ֆրանսայի արդիւնաբերութեան նախարարը շեշտեց, որ ֆրանսական ընկերութիւնները պէտք է այսուհետեւ խուսափին ներդրումներ կատարելէ Միացեալ Նահանգներու մէջ: Թայուանի կառավարութիւնը իր կարգին 2,7 միլիառ տոլար յատկացուց՝ օգնելու Թրամփի տուրքերէն տուժած ընկերութիւններուն:
Կարճ ժամանակ ետք, միջազգային ելեւմտական եւ տնտեսական շուկաներուն մէջ սկսած են յայտնուիլ ցնցումներ եւ ապակայունութեան նշաններ: Նիւ Եորքի սակարանին մէջ գրանցուեցաւ սակարանի հաւաքական նահանջ:
