Սոցիալ Դեմոկրատ Հնչակեան Կուսակցութեան Լիբանանի շրջանի Վարիչ մարմինը խստիւ կը դատապարտէ Չորեքշաբթի, 2 Ապրիլի գիշերուայ ժամը 10:05-ին Խալիլ Պատաուի թաղամասին մէջ գտնուող ՀՄՄ Պէյրութի ակումբին ուղղութեամբ հրաձգութիւնը, որ կատարեցին մոթորսիքլէթով թաղ մուտք գործած դիմակաւոր երկու անծանօթներ: Յաւելեալ մտահոգութիւն կը յառաջացնէ այն, որ նկատի առնելով այդ պահուն ակումբին խճողուածութիւնը եւ մանաւանդ մուտքի դարպասին մօտ քանի մը պատանիներու ներկայութիւնը, կրակոցը կրնար առաջնորդել աւելի լուրջ, նոյնիսկ անդառնալի հետեւանքներու:
Այսպիսի միջադէպեր մտահոգիչ են ոչ միայն համապատասխան թաղամասի բնակչութեան, այլ բոլոր լիբանանցիներուն, որոնց փափաքն է հնարաւորութիւն ունենալ ապրելու ապահով, խաղաղ եւ բարգաւաճ կեանք մը: Կը գնահատենք ՍԴՀԿ «Աղասի» մասնաճիւղի մեր ընկերներուն եւ ընդհանրապէս թաղեցիներուն պատասխանատու կեցուածքն ու աչալրջութիւնը, նաեւ կ’ողջունենք ապահովական առնչակից մարմիններուն անյապաղ ժամանումն ու կատարած հետաքննութիւնները, մաղթելով որ շուտով կարելի ըլլայ բացայայտել յանցագործներուն ինքնութիւնը եւ զանոնք ենթարկել արժանի պատիժի: Պատրաստակամութիւն կը յայտնենք հնարաւոր բոլոր միջոցներով աջակցելու ապահովական եւ դատական կառոյցներուն՝ կանխելու համար Լիբանանի ամբողջ տարածքին նման միջադէպերու կրկնութիւնը: Հաւաքական ջանքերով պիտի երաշխաւորուի, որ երկար տարիներէ ի վեր առաջին անգամ ըլլալով այս թաղամասին եւ ակումբին թիրախաւորումը ըլլայ եզակի պարագայ մը եւ վստահաբար վերջինը: Խալիլ Պատաուին խաղաղ է ու այդպէս պիտի մնայ:
