Երեքշաբթի օր, հաճոյքն ունեցանք ընդունելու Ս.Դ.Հ.Կ. Կիպրոսի Վարիչ մարմինի երկու անդամներ, որոնք հիւրաբար կը գտնուէին Լիբանան: Ատենապետ ընկ. Ռազմիկ Տիգրանեան եւ ատենադպիր ընկերուհի Վերգինէ Պէքարեան փափկավարական եւ ընկերական այցելութեամբ եկան իրենց ողջոյնները փոխանցելու մեզի եւ ծանօթանալու «Արարատ»-ի աշխատանքներուն: Հիւրերուն հետ զրուցեցինք ընդհանրական հարցեր՝ մեր գաղութներն ու Ս.Դ.Հ.Կ.-ի գործունէութիւնը յուզող: Այս առթիւ, մեծ ուրախութեամբ տեղեկացանք Կիպրոսի մեր միաւորին աշխուժութեան շուրջ, նաեւ Կիպրոսի թեմէն ներս կատարուող աշխատանքներուն՝ նկատի առնելով որ ընկերուհի Վ. Պէքարեան անդամ է Կիպրոսի թեմի Ազգային Վարչական ժողովին, որն է թեմին գործադիր իշխանութիւնը:
Իրենց հերթին, յարգելի հիւրերը ծանօթացան «Արարատ»-ի առօրեային ու դժուարութեանց եւ ողջունեցին այն ջանքները, որոնք կը դրուին «Արարատ»-ի յարատեւման եւ բարգաւաճման: Անոնք դրական էին տպաւորուած նաեւ Լիբանանի Ս.Դ.Հ.Կ.-ի եւ Հ.Մ.Մ.-ի աշխուժութեամբ եւ հնչակեան առոյգ շարքերով ու երիտասարդներու ներկայութեամբ:
Հիւրերուն հետ մեր սիրալիր հանդիպումը եղաւ ոգեւորիչ եւ խթանիչ երկուստեք: Այս առումով շեշտեցինք միջգաղութային ծանօթացման եւ գործակցութեան կարեւորութիւնը կուսակցական գետնի վրայ, ինչպէս նաեւ նոր տարրեր եւ ուժեր ներգրաւելու անհրաժեշտութիւնը: Ի հարկէ, ընդգծեցինք թէ կազմակերպչական հարցերը լի են դժուարութիւններով, սակայն զանոնք դիմագրաւելը նկատեցինք յաղթահարելի մարտահրաւէրներ եւ վճռականութեամբ գործելու գրաւականներ: Մեր կարգին, մեր սրտագին ողջոյնները յղեցինք Կիպրոսի ընկերներուն եւ համակիր շրջանակին: Փոխադարձ յարգանքով եւ լաւատեսութեամբ տեղի ունեցած այս հանդիպման ներկայ էին նաեւ «Արարատ»-ի օժանդակ մարմինի անդամներ:
