Հայաստան բազմաթիւ ոլորտներու մէջ աշխարհի լաւագոյն երկիրներէն չէ, սակայն ժողովուրդին խելացութեան համաշխարհային աղիւսակին մէջ կը գրաւէ առաջատար դիրք: Մարդուն բանականութեան գործակիցը (IQ) չափելու համար նկատի կ’առնուին տրամաբանական մտածողութիւնը, ուսողութեան հմտութիւնները, խնդիրներու լուծումը, յիշողութեան եւ մշակումի արագութիւնը, բանաւոր եւ տարածական մտածողութիւնը: IQ չափող համացանցային քննութեան «international-iq-test.com» կայքին վրայ հրապարակուած է աշխարհի 126 երկիրներ, որոնց քաղաքացիները նշեալ կայքին վրայ չափած են իրեն բանականութեան գործակիցը: Կայքը ապա հաշուած է իւրաքանչիւր երկրէն բոլոր մասնակիցներուն միջինը, անոր հիման վրայ կազմելով միջին բանականութեան համաշխարհային աղիւսակը: 2025-ի արդիւնքներուն համաձայն, Չինաստան կը գրաւէ առաջին դիրքը՝ 107,19 միջինով, որուն կը յաջորդեն Արեւելեան Ասիոյ երկիրներէն Հարաւային Քորէան եւ Ճափոնը: Իրան 4-րդ է, Սինկափուր՝ 5-րդ: Ըստ այս աղիւսակին, Հայաստան կը գրաւէ աշխարհի 8-րդ դիրքը (102,58), անոր կը նախորդէ Մոնկոլիան եւ կը յաջորդէ Աւստրալիան: Լաւագոյն տասնեակին մէջ են նաեւ Ռուսիան՝ 6-րդ եւ Սպանիան՝ 10-րդ: Լիբանան կը գրաւէ աղիւսակին 37-րդ դիրքը (99,39 միջինով): Հայաստանի եւ Լիբանանի մնացեալ հարեւաններէն Վրաստան 21-րդ է, Իսրայէլ՝ 45, Թուրքիա՝ 46 եւ Ատրպէյճան՝ 48-րդ: Աղիւսակին վերջին հինգ դիրքերը կը գրաւեն Կապոնը, Անկոլան, Պենինը, Մոզամպիքը եւ Քոնկօն, իսկ շուրջ 70 երկրի տուեալները ընդհանրապէս չեն նշուած այս աղիւսակին վրայ:
