Լիբանանեան բանակի հրամանատարութիւնը յայտարարեց, թէ ընդարձակ խուզարկումներու ձեռնարկած է հիւսիսային եւ արեւմտեան Պեքաայի հիւսիսային եւ արեւմտեան զանազան շրջաններու մէջ՝ կասկածելիները ձերբակալելու եւ ապօրինի նիւթերը առգրաւելու նպատակով: Ըստ յայտարարութեան, Պաալպաքի Շարաունէ թաղամասին մէջ ձերբակալուած քաղաքացիին մօտ յայտնաբերուած եւ գրաւուած է զէնք ու զինամթերք, իսկ Ռաշայայի սահմանային Տէյր էլ-Աշայէր շրջանին մէջ ձերբակալուած է զէնքերու մաքսանենգումով զբաղող մարդ մը: Ձերբակալուած քաղաքացիներն ու գրաւուած նիւթերը յանձնուած են դատական պատկան մարմիններուն՝ հետաքննութիւնը շարունակելու նպատակով: Նշենք, որ բանակի գործողութիւնը սկսաւ Պաալպաքի մօտակայ Քնէյսէ շրջանին մէջ սպաննուած ամերիկացի-լիբանանցիի մը մարմինին բացայայտումէն ետք: Այդ շրջանը ծանօթ է որպէս թմրանիւթերու վաճառականութեան եւ աւազակախումբերու աշխուժութեան տարածք: Բանակը այլ յայտարարութեամբ մը նշեց, թէ Սուրիոյ հետ սահմանին վրայ փակած է ապօրինի երկու անցակէտ եւս:
