Մարոնի եպիսկոպոսներու խորհուրդը գումարեց իր ամսական հերթական նիստը՝ կարտինալ Պըշարա Ռահի պատրիարքին գլխաւորութեամբ, որուն ընթացքին արծարծեց լիբանանեան զարգացումները: Խորհուրդը հանգստութիւն յայտնեց պետական նշանակումներու ընթացքին առնչութեամբ, մաղթելով, որ այդ ըլլայ արմատական բարեկարգումներու սկիզբը: Եպիսկոպոսները իրենց աջակցութիւնը յայտնեցին պետութեան՝ 1701 բանաձեւի ամբողջական գործադրութիւնը ապահովելու ջանքերուն, պահանջելով որ պետական հաստատութիւնները իրենց հեղինակութիւնը պարտադրեն երկրի ամբողջ տարածքին, զէնք կրելու եւ գործածելու իրաւունքը վերապահելով միայն պետական օրինական հաստատութիւններուն: Այն ինչ կը վերաբերի քաղաքապետական ընտրութիւններուն, Մարոնիներու խորհուրդը Պէյրութի եւ մեծ քաղաքներու բնակիչներէն պահանջեց յարգել Լիբանանին յատուկ բազմազանութեան երեւոյթը:
