Սոցիալ Դեմոկրատ Հնչակեան Կուսակցութեան Լիբանանի շրջանի Վարիչ մարմինը ներկայացնող պատուիրակութիւն մը, գլխաւորութեամբ ատենապետ ընկ. Վանիկ Տագէսեանի, երէկ այցելեց Տանն Կիլիկիոյ Կաթողիկէ Հայոց Ռաֆայէլ Պետրոս ԻԱ. Կաթողիկոս-պատրիարքին:
Տեսակցութիւնը առիթ էր փոխադարձ ծանօթացումի եւ Լիբանանն ու լիբանանահայութիւնը յուզող հարցերու քննարկումի: Արծարծուեցան մասնաւորաբար լիբանանեան քաղաքական, ապահովական եւ տնտեսական վիճակը, քաղաքացիները յուզող խնդիրները, լիբանանահայութեան դիմագրաւած մարտահրաւէրները, ինչպէս նաեւ Միջին Արեւելքի հրատապ խնդիրները: Երկուստեք շեշտուեցաւ որպէս լիբանանահայեր միասնականութիւնը պահպանելու եւ աւելի ամրապնդելու հրամայականը:
ՍԴՀԿ-ի պատուիրակութիւնը բարձր գնահատեց Հոգեւոր Տիրոջ հոգատար ծառայութիւնը, մաղթելով յաջողութիւն եւ յայտնելով համագործակցութեան մնայուն պատրաստակամութիւն՝ յանուն Լիբանանին եւ Լիբանանահայութեան բարօրութեան:
