Լիբանանի կառավարութիւնը իր հերթական նիստին ընթացքին քուէարկութեամբ Քարիմ Սուէյտը նշանակեց Կեդրոնական դրամատան կառավարիչ: Որոշումը հրապարակուեցաւ 17 նախարարներու թեր քուէարկութեամբ, թէեւ վարչապետը եւ շարք մը նախարարներ նախապէս յայտնած էին իրենց վերապահութիւնը: Տեղեկատուութեան նախարար Փօլ Մարքոս նիստէն ետք յայտնեց, թէ դատաւոր Ժամալ Հաժժար նշանակուած է ընդհանուր դատախազ, իսկ Եուսէֆ Ժամիլ՝ Պետական շուրայի խորհուրդի անդամ: Կառավարութիւնը որոշած է նաեւ չեղարկել այս տարուայ միջնակարգի պետական քննութիւնները (Պրէօվէ) եւ բաւարարուիլ դպրոցական նիշերով:
