Միջին Արեւելքի հարցերով ամերիկացի յատուկ պատուիրակի տեղակալ Մորկըն Օրթէյկըս Լիբանանէն հրթիռներու արձակումը համարեց զինադադարի բացայայտ խախտում եւ նշեց, որ կառավարութիւնը կարողութիւն չունի պարտադրելու իր հեղինակութիւնը: «Չենք կրնար ըսել, որ Իսրայէլ կը խախտէ զինադադարը, այլ Լիբանանի կառավարութիւնը պէտք է վերջ դնէ հրթիռարձակումներուն, միւս կողմը ամբաստանելու փոխարէն», ըսաւ Օրթէյկըս, իսրայէլեան հարուածները համարելով «հակադարձութեան իրաւունքի դրսեւորում»: Յիշեցնելով, որ Իսրայէլ որպէս բարի կամքի դրսեւորում ազատ արձակած է լիբանանցի գերիները, ամերիկացի պաշտօնատարը շեշտեց Հըզպալլան ապազինելու անհրաժեշտութիւնը, աւելցնելով որ իրենք կը պահանջեն սահմանային բռնագրաւեալ կէտերէն իսրայէլեան նահանջ եւ երկու կողմերուն միջեւ քաղաքական բանակցութիւններու կայացում: «Կ’աջակցինք լիբանանեան բանակին, սակայն անոր կատարածը բաւարար չէ», դժգոհեցաւ Օրթէյկըս:
