Հայ քաղաքական երեք կուսակցութիւններուն՝ ՌԱԿ-ի, ՀՅԴ-ի եւ ՍԴՀԿ-ի Լիբանանի ղեկավար մարմիններու ներկայացուցիչներուն հերթական նիստը տեղի ունեցաւ Հինգշաբթի, 27 Մարտ 2025-ին, ՍԴՀԿ-ի կեդրոնատեղիին մէջ, Նոր Հաճըն։
Oրակարգի առաջին նիւթը կը վերաբերէր Հայոց ցեղասպանութեան 110-ամեակի ոգեկոչումի ձեռնարկներուն։ Ժողովը հաստատեց ոգեկոչումի կեդրոնական մարմինին կազմը, որուն զուգահեռ պիտի գործէ նաեւ Հայոց ցեղասպանութեան 110-ամեակի ոգեկոչումի երիտասարդական մարմին մը։ Թէ՛ կեդրոնական, թէ՛ երիտասարդական մարմինները կը գումարեն ծրագրային ու կազմակերպչական նիստեր, որոնց մասին պաշտօնական հաղորդագրութիւններով տեղեակ պիտի պահուի լիբանանահայութիւնը։
Խորհրդակցութեան նիւթ էր նաեւ լիբանանեան ընդհանուր վիճակը՝ ներառեալ վերջին իրադարձութիւնները, պետական նշանակումները եւ Մայիսին կայանալիք քաղաքապետական եւ թաղապետական ընտրութիւնները։
Նիստին աւարտին, ՍԴՀԿ-ի, ՀՅԴ-ի եւ ՌԱԿ-ի ներկայացուցիչները ողջունեցին Եւրոպական խորհրդարանին որդեգրած բանաձեւը, որ կը դատապարտէ ատրպէյճանական ոտնձգութիւնները եւ կը պահանջէ անյապաղ ազատ արձակել հայ գերիները, ակնկալելով որ այդ բանաձեւը գործնական փուլ մտնէ ու Եւրոպական միութեան երկիրները ճնշում բանեցնեն Պաքուի իշխանութիւններուն վրայ՝ բանաձեւը գործադրել տալու համար։
