Հանրապետութեան նախագահ Ժոզէֆ Աուն դատապարտեց իսրայէլեան շարունակական խախտումները եւ յստակացուց, որ Լիբանան յանձնառու կը մնայ 1701 բանաձեւի գործադրութեան եւ զինադադարի համաձայնութեան: Այլ գիծի վրայ, Աուն նշեց, որ առայժմ արտօնութիւն պիտի չտրուի Իրանի հետ օդանաւային հաղորդակցութեան վերականգնումին: Աուն իսրայէլեան հարուածներուն մասին տեղեկացաւ Փարիզի մէջ, ուր իր ֆրանսացի պաշտօնակիցին հրաւէրով մասնակցեցաւ Լիբանանի, Ֆրանսայի, Կիպրոսի եւ Յունաստանի ղեկավարներուն ժողովին, որուն ընթացքին քննարկուեցան տարածաշրջանային զարգացումները եւ համագործակցութեան միջոցները, ինչպէս նաեւ հեռաձայնային հաղորդակցութիւն եղաւ Սուրիոյ նախագահ Ահմատ Շարաայի հետ:
Իսկ վարչապետ Նաուաֆ Սալամ հեռաձայնային հաղորդակցութիւններ ունեցաւ հանրապետութեան եւ խորհրդարանի նախագահներուն, ինչպէս նաեւ տարածաշրջանի հարցերով ամերիկացի պատուիրակի տեղակալին հետ՝ պահանջելով անյապաղ միջամտել ու դադրեցնել իսրայէլեան ոտնձգութիւնները: Ան պահանջեց, որ իսրայէլեան ուժերը անյապաղ քաշուին լիբանանեան սահմանային բլուրներէն, որ գրաւած էին պատերազմին ընթացքին:
Միւս կողմէ, Իսրայէլի վարչապետ Պենիամին Նեթանիահու շեշտեց, որ «անոնք որոնք տակաւին չեն ընկալած Լիբանանի նոր վիճակը, այսօր ստացան մեր վճռականութիւնը ապացուցող նոր օրինակ մը»: Ան խոստացաւ, որ իսրայէլեան սահմանամերձ բնակավայրերուն բնակիչները պիտի վերադառնան տուն, իսկ բանակը պիտի հարուածէ վտանգ ներկայացնող բոլոր կէտերը: Իսկ պաշտպանութեան նախարար Իսրայէլ Քաց զգուշացուց, որ «եթէ Քրիաթ Շիմոնայի եւ միւս բնակավայրերուն բնակիչները ապահով չըլլան, ապա Պէյրութի մէջ հանդարտութիւն պիտի չտիրէ»:
