Վարչապետ Նաուաֆ Սալամ նախանցեալ օր այցելեց Աքքար, ուր շրջագայեցաւ Սուրիոյ սահմանին մօտակայ ծովեզերեայ Քլէյաաթ շրջանին մէջ գտնուող Ռընէ Մուաուատի անուան օդակայանը՝ ստուգելու այդ ենթակառոյցը որպէս միջազգային օդակայան գործարկելու հնարաւորութիւնները: Սալամ ապա յայտնեց, թէ համաձայնութիւն կնքուած է «Տար էլ-Հանտասա» ընկերութեան հետ՝ մշակելու համար օդակայանին վերաբերող մանրամասնուած ուսումնասիրութիւն մը, որուն հիման վրայ որոշում պիտի կայացուի օդակայանը բարեկարգելու եւ վերաբանալու կամ այդ ծրագրէն հրաժարելու մասին: Նշենք, որ նկատի առնելով լիբանանեան մայրուղիներուն խճողուածութիւնը, Սալամ Աքքար ուղղուեցաւ ուղղաթիռով: Սալամ այցելեց նաեւ Թրիփոլի, ուրկէ յայտնեց, թէ հիւսիսի մայրաքաղաք ժամանած է վերահաստատելու, որ կառավարութիւնը յանձնառու կը մնայ քաղաքին ու անոր բնակչութեան անվտանգութեան պահպանումին:
