Կառավարութիւնը այսօր Պաապտայի պալատին մէջ պիտի գումարէ իր հերթական նիստը՝ շարունակելու համար օրակարգի քննարկումը: Հանրապետութեան նախագահ Ժոզէֆ Աուն յայտնեց, թէ կը նախապատրաստուի Ուրբաթ օր իր ֆրանսացի պաշտօնակից Էմանուէլ Մաքրոնի հետ գումարուելիք ժողովին, նկատի առնելով Լիբանանի եւ շրջանին մէջ Փարիզի կարեւոր դերակատարութիւնը եւ Լիբանանի նոր նախագահի ընտրութեան մէջ Մաքրոնի անձնական ջանքերը: Պաապտայի պալատին մէջ ֆրանսացի յատուկ պատուիրակ Ժան Իվ Լը Տրիանը ընդունած ատեն Աուն յայտնեց, թէ ջանք կը թափէ վերականգնելու կառավարութեան նկատմամբ լիբանանցիներուն վստահութիւնը, որպէսզի կարելի ըլլայ յաղթահարել բարեկարգումներու իրագործումին առջեւ ցցուած մարտահրաւէրները: «Քննարկումները սկսած ենք Արժոյթի միջազգային հիմնադրամին հետ՝ գոհացնելու համար պայմանները», ըսաւ Աուն: Անդրադառնալով հարաւի զարգացումներուն, Աուն պահանջեց, որ զինադադարի համաձայնութիւնը երաշխաւորող միջազգային կողմերը միջամտեն ու զսպեն իսրայէլեան խախտումները: Նախագահը ֆրանսացի պատուիրակին հետ խօսեցաւ նաեւ լիբանանեւսուրիական սահմանի զարգացումներուն մասին:
