Լիբանանահայուն գրադարանը նոր գրքոյկով մը հարստացաւ Կիրակի օր: Հեղինակը Ռըմէյլի Սուրբ Յարութիւն եկեղեցւոյ երիտասարդ հոգեւոր հովիւ Տէր Ղեւոնդ քհնյ. Լոշխաճեանն է:
31 հոգեւոր «սնունդներով»՝ հետաքրքրաշարժ կարճ պատմուածքներով յագեցած սոյն հատորով հոգեւորական հեղինակը խիզախաբար կը փորձէ մուտք գործել սփիւռքահայ գրականութեան մէջ: Ան իր աշխատանքը կը ձօնէ զինք բազմիցս խրախուսած ու եկեղեցւոյ մէջ երկարամեայ ծառայութիւն ունեցած օրդ. Լուսին Թապագեանի յիշատակին՝ անոր մահուան երկրորդ տարելիցին առիթով, հայոց լեզուի եւ հայոց պատմութեան վաստակաշատ ողբացեալ ուսուցչուհիին փափաքին ընդառաջելով:
Գրքոյկին կազմաւորման, խմբագրական եւ հրատարակչական աշխատանքները բծախնդրօրէն կատարած է «Ծաղիկ» գրական հանդէսի խմբագիր տիար Յակոբ Տիւնեայեանը: Էջադրումը եւ կողքի գեղարուեստական յղացքը կը պատկանի տիար Գօգօ Հաւանճեանին:
Հատորի շնորհահանդէսը կատարուեցաւ Կիրակի կէսօրին, Ռըմէյլի Սուրբ Յարութիւն եկեղեցւոյ սրահին մէջ, եկեղեցւոյ Տիկնանց յաձնախումբին եւ Թաղական խորհուրդին կողմէ պատշաճօրէն կազմակերպուած ճաշկերոյթի մը ընթացքին, գերապատիւ Տ. Շնորհք ծ. վրդ. Աշըգեանի եւ գերշ. Տ. Յովակիմ վրդ. Բանճարճեանի, հատորի խմբագիրին, Օրդ. Թապագեանին ծանօթ ազգայիններու եւ եկեղեցւոյ բարեկամներու ներկայութեամբ:
Արժանապատիւ Տէր հօր անդրանիկ հատորին լոյս ընծայման առիթով կազմակերպուած ձեռնարկին մասին պիտի պատմենք հետագային, մեր մշակութային էջին մէջ:
