Համագործակցութեամբ Ս.Դ.Հ.Կ.-ի Տխրունի Ուս. Երիտ. Միութեան վարչութեան, Երկուշաբթի 17 Մարտի երեկոյեան, «Արարատ» օրաթերթի խմբագրատան մէջ տեղի ունեցաւ «Վիճաբանական երեկոյ»ի ձեռնարկ՝ «Տան մէջ անասուն պահելը ճի՞շդ է, թէ՞ ոչ» թեմայով:
Մարդաշատ էր «Արարատ»-ի սրահը: Պատանի տխրունիականներուն ունկընդրելու ժամանած էին Ս.Դ.Հ.Կ.-ի Վարիչ մարմինի ատենապետ ընկեր Վանիկ Տագէսեանը, Մամլոյ դիւանապետ՝ ընկեր Գէորգ Տաղլեանը ու անդամներէն շատեր, ինչպէս նաեւ մասնաճիւղային վարչութիւններէն ներկայացուցիչ ընկեր-ընկերուհիներ, ծնողներ, բարեկամներ:
«Արարատ»-ի տնօրէն ընկեր Նազօ Ճէրէճեան իր ողջոյնի խօսքին մէջ հակիրճ ձեւով անդրադարձաւ ընկերութեանց մէջ սխալ ձեւով ընթացող վիճաբանական երեւոյթներուն բացասական ազդեցութեան՝ ընտանեկան, ընկերային, միութենական եւ այլ գործընթացներուն վրայ: Բացատրելով այսօրուան վիճաբանական ասուլիսին նպատակը, ընկերը շեշտեց, որ «Արարատ»-ի Օժանդակ յանձնախումբին նպատակը սոսկ միջոցառում մը կատարելն ու անցնիլը չէ, այլ՝ մեր պատանիներուն, ապագայ սերունդի ներկայացուցիչներուն քով վիճաբանելու օրէնքներն ու զրուցակիցը համոզելու վարպետութիւնը սորվեցնելն է:
Ան յայտնեց նաեւ, որ երեկոյի կազմակերպողները այն ընկեր-ընկերուհիներն են, գլխաւորութեամբ ընկերուհիներ Քրիսթին Շահինեանի եւ Զարիկ Քիւրքճանի, որոնք ատենէ մը ի վեր կամաւոր ձեւով կը հերթապահեն խմբագրատան մէջ, կատարելով խմբագրատան գրադարանային, կահաւորման եւ այլ աշխատանքներ: Անոնց նախաձեռնութեամբ ծնունդ առած սոյն վիճաբանական ասուլիսները պիտի շարունակուին յառաջիկային, առաւել լուրջ թեմաներով: Ընկեր Ճէրէճեան բացատրեց նաեւ, որ այսօրուան՝ «Տան մէջ անասուն պահելը ճի՞շդ է, թէ՞ ոչ» նիւթը առաջինն ըլլալով, ընտրուած է որպէս դիւրատար նիւթ:
Վիճաբանական երեկոն վարելու համար հրաւիրուեցաւ ընկերուհի Քրիսթին Շահինեանը: Պէտք է խոստովանիլ, որ ան իր պարտականութիւնը յաջողութեամբ կատարեց, մէկ ժամի չափ լարուած ու հետաքրքրաշարժ մթնոլորտ մը ստեղծելով:
Վիճաբանող թեր ու դէմ կողմերը կը բաղկանային երեքական տխրունիական պատանիներէ: Թեր կողմը բաղկացած էր հետեւեալներէ՝ Փաթիլ Փափազեան, Սեւակ Գլընճեան եւ Թամար Քէշիշօղլեան: Դէմ կողմը՝ Կալիա Նորշահեան, Սերժ Ագրապեան եւ Նայիրի Թաքաշեան: Իսկ ընկերներ՝ Գէորգ Տաղլեան եւ Փօլ Ղազարեան որպէս դատական կազմի անդամներ հրաւիրուեցան՝ գնահատելու կողմերուն կատարումները:
Ներկաները հետաքրքրութեամբ լսեցին մեղադրող ու պաշտպանող կողմերուն ելոյթները, որոնք կը բնորոշուէին երբեմն ծանօթ փաստարկումներով, մերթ՝ բոլորին կողմէ անյայտ, սակայն տրամաբանական ապացոյցներով, երբեմն ալ՝ ծիծաղաշարժ բեմականացումով:
Աւարտին, դատական կազմը ներկայացուց օրուան վիճաբանական ասուլիսին մասին իր տպաւորութիւնները եւ արդիւնքները՝ 270-ի դէմ 275 միաւորի առաւելութեամբ կշիռը թեր խմբակին կողմն էր:
Ներկաները կը յամենային «Արարատ»-ի խմբագրատունէն հեռանալ, խորհրդածելով եւ իրենց կարծիքներն ու տպաւորութիւնը յայտնելով, մինչ տխրունիականներ կը կատարէին պատշաճ հիւրասիրութիւն:
ԹՂԹԱԿԻՑ
