Վարչապետ Նաուաֆ Սալամ յայտնեց, որ ելեւմտական բարեկարգումներ կատարելու եւ աւանդները իրեց տէրերուն վերադարձնելու բնական միջոցն է դրամատնային գաղտնապահութիւնը վերացնել եւ օրինական դրամը անջատել անօրինականէն: «Դրամատուները պէտք է կրեն պատասխանատուութեան մէկ բաժինը եւ անոնցմէ կը պահանջուի բարձրացնել դրամագլուխները եւ վերակազմակերպել կառուցուածքը», ըսաւ Սալամ: Ան ապա ընդունեց Արտաքին հարցերու խորհրդարանական մնայուն յանձնաժողովի պատուիրակութիւնը, որուն հետ քննարկեց գաղթականներուն, հիւսիսային եւ արեւելեան սահմաններուն վերաբերող խնդիրները: Վարչապետը երեսփոխաններուն ներկայացուց իսրայէլեան բռնարարքները զսպելու ուղղութեամբ Լիբանանի որդեգրած դիւանագիտական ու քաղաքական քայլերը: Իսկ փոխվարչապետ Թարէք Միթրի իր կարգին յստակացուց, թէ տակաւին չկան Կեդրոնական դրամատան կառավարիչի թեկնածուներ, աւելցնելով որ այդ մասին թեկնածուներու առաջադրումը վերապահուած է ելեւմուտքի նախարարին:
