Հանրապետութեան նախագահ Ժոզէֆ Աուն հաւաստիացուց, որ զարթօնքն ու Լիբանանի վերականգնումը անկարելի չէ, եթէ քաղաքական ուժերը խուսափին յարանուանական եւ հատուածական նեղ շահերէ, փոխարէնը գերադասելով Լիբանանի գերագոյն շահը: «Բազմազանութիւնը Լիբանանի հարստութիւնն է, իսկ տարակարծութիւնները պէտք է միշտ պահել համագոյակցութեան սամանին մէջ», ըսաւ Աուն, Պաապտայի պալատին մէջ ընդունելով Ընկերվար յառաջդիմական կուսակցութեան առաջնորդ, երեսփոխան Թէյմուր Ճոմպլաթն ու նախկին երեսփոխան Ուալիտ Ճոմպլաթը: Աուն շեշտեց միասնականութեան եւ համախոհութեան կարեւորութիւնը՝ յանուն լիբանանեան հանրային շահին եւ ճակատագրական մարտահրաւէրներու դիմագրաւումին, մանաւանդ նկատի առնելով տարածաշրջանային վտանգաւոր իրավիճակը: Աուն իր այցելուներուն հետ ունեցած տեսակցութիւններուն ընթացքին շեշտեց միշտ պետական գերագոյն շահերը առաջնահերթ համարելու կարեւորութիւնը: Իսկ ՌԱԿ-էն պատուիրակութիւն մը ընդունած ատեն, նախագահ Աուն դրուատեց լիբանանահայութեան դերակատարութիւնը, հայերը համարելով լիբանանեան հաւաքականութեան արժէքը բարձրացնող խմբաւորում մը: «Հայերը Լիբանան ժամանումով յաւելեալ ուժ շնորհեցին երկրին, մաս կազմեցին տնտեսութեան կառուցումին, պաշտպանեցին երկիրը եւ միշտ կանգնեցան անոր կողքին», ըսաւ Աուն:
Հանրապետութեան նախագահը այլ գիծի վրայ շեշտեց սննդամթերքի անվտանգութիւնը պահպանելու անհրաժեշտութիւնը, զգուշացնելով լիբանանցիներուն առողջութիւնը վտանգելու հետեւանքներէն: Ան պահանջեց նաեւ պատժել բոլոր անոնք, որոնք կը խախտեն սննդանիւթի ոլորտը տնօրինող օրէնքները:
