Մայրաքաղաք Երեւանում է գտնւում Երեւանի օլիմպիական հերթափոխի պետական մարզական քոլէճը (ԵՕՀՊՄՔ), որն ունի աւելի քան 50 տարուայ փառահեղ անցեալ ու ներկայ։ Այստեղ անվճար կրթւում եւ մարզւում է մարզական կենսագրութիւն կերտող մատաղ սերունդը Հայաստանի տարբեր քաղաքներից ու մարզերից։ Մարզադպրոցը ղեկավարում է յունահռոմէական ըմբշամարտի Աշխարհի ախոյեան, քոլէճի շրջանաւարտ Վաղինակ Գալուստեանը, ով աշխատանքը համարում է պայքար՝ այն նմանեցնելով մարմնամարզին, որտեղ կայ՝ նպատակ, նուիրում եւ յաղթանակ։
Գործունէութեան տարիներից ի վեր մարզական այս դարբնոցն աշխարհին տուել է հարիւրաւոր տիտղոսակիր մարզիկներ՝ Օլիմպիական խաղերի, Աշխարհի ու Եւրոպայի առաջնութիւնների ախոյեաններ ու մրցանակակիրներ՝ Խորէն Յովհաննիսեան, Հոկսեն Միրզոյեան, Արմէն Նազարեան, Վաղինակ Գալուստեան, Կարէն Մնացականեան, Արամ Մարգարեան, Արսէն Յարութիւնեան եւ այլք։ Հպարտօրէն պէտք է աւելացնենք, որ այսօր Հայաստանի մարզական նուաճումների զգալի մասը միջազգային մրցաշարերից հայրենիք են բերում ԵՕՀՊՄ քոլէճի մարզիկները, նրանց պատուին էլ հնչել է Հայաստանի օրհներգն ու ծածանուել հայոց Եռագոյնը։
Կարեւոր առաքելութիւն է ստանձնել մեր մարզադպրոցը՝ կեանքի կոչել մատաղ սերնդի մարզական երազանքները, որոնց իրագործմանն անխոնջ նուիրուած են քոլէճի բարձրակարգ ու վաստակաւոր մարզիչները, փորձառու մանկավարժներն ու դասախօսները: Ուսուցումն այստեղ իրականացւում է հանրակրթական եւ միջին մասնագիտական բաժիններում, սովորողներն ապահովուած են անվճար բուժօգնութեամբ, սնունդով եւ կեցութեամբ։ Հանդիսանալով Հայաստանի հաւաքական խումբերը սնուցող երակներից մէկը՝ մարզադպրոցն ապահովում է հայկական մարզաշխարհի սերնդափոխութիւնը, որտեղ կոփւում ու մարզւում է մի սերունդ, որի նուաճումները փառք ու պատիւ են բերում ե՛ւ քոլէճին, ե՛ւ հայրենիքին, ե՛ւ հայ ժողովրդին։
Յաւելենք, որ ՀՀ կառավարութեան աջակցութեամբ վերանորոգուել են մարզադպրոցի խաղային բաց մարզադաշտերը, ծանրամարտի մարզադահլիճը, կառուցուել են բաց մարզահրապարակներ, շահագործման է յանձնուել նորակառոյց բարձրակարգ հիւրանոցային համալիրը, ընթանում է ըմբշամարտի մարզադահլիճի վերանորոգումը։
Միջազգային չափորոշիչներին համապատասխան բարեկարգ պայմանները հնարաւորութիւն են տալիս քոլէճում ընդունել մարզիկների ոչ միայն Հայաստան հեռաւոր մարզերից, այլեւ արտերկրից՝ Յունաստանից, Իրանից, Քաթարից, Պուլկարիայից, Վրաստանից, Պելառուսիայց, Ռուսաստանից, Լեհաստանից, Իտալիայից, Փորթուկալից, Բալթեան երկրներից եւ Միջին Ասիայից։ Հիւրընկալուելով մեզ մօտ՝ նրանք անցկացնում են ուսումնամարզական հաւաքներ եւ մասնակցում են միջազգային խոշոր մրցաշարերի։
ԵՕՀՊՄ քոլէճը պատրաստակամ իր հարկի ներքոյ ընդունել Սփիւռքի հայկական կառոյցների մարզիկներին՝ ընձեռելով նրանց հայրենիքում համատեղ ուսումնամարզական հաւաքներ եւ մարզական ճամբարներ անցկացնելու հնարաւորութիւն։ Նրանք կ’ունենան հայկական մարզաշխարհի առասպելների ու տիտղոսակիր մարզիկների հետ շփուելու, օգտակար խորհուրդներ ստանալու մեծ հնարաւորութիւն։
Մենք առաջատար ենք գիտութեան մէջ, բարձրաճաշակ՝ արուեստում, ուժեղ՝ սպորտում։
https://www.facebook.com/olimpiakancollege
ՋԵՄՄԱ ԲԱՂԴԱԴԵԱՆ
