Շարունակելով ամէն ուղղութեամբ յարձակողական քաղաքականութիւն որդեգրելու իր ուղեգիծը, Միացեալ Նահանգներու նախագահ Տոնըլտ Թրամփ յայտնեց, որ չ’ուզեր պատերազմ մղել Չինաստանի դէմ, սակայն եթէ այդ անհրաժեշտ ըլլայ, ապա Միացեալ Նահանգներ լաւապէս պատրաստուած է այդ ընտրանքին: Ան մաղթեց, որ շուտով կարելի ըլլայ վերջ տալ Ուքրանիոյ մէջ ընթացող պատերազմին, որովհետեւ հազարաւոր մարդիկ կը մահանան այնտեղ եւ անհրաժեշտ է վերականգնել խաղաղութիւնը: Խօսելով Եւրոպայի, Գանատայի եւ այլ երկիրներու նկատմամբ սահմանուած նոր տուրքերուն մասին, Թրամփ վստահութիւն յայտնեց, որ այդ մաքսային վճարներուն շնորհիւ Միացեալ Նահանգներ պիտի ստանայ միլիառաւոր տոլարներ:
