Վարչապետ Նաուաֆ Սալամ յայտնեց, որ կառավարութեան աշխատանքային ծրագրի հրապարակումով Լիբանան փակած է Հըզպալլայի զէնքին էջը, իսկ անոր «Դիմադրութիւն-բանակ-ժողովուրդ» հասկացութիւնը անցած է պատմութեան: «Ալ-Արապիա» լրատուական ցանցին տուած հարցազրոյցին մէջ Սալամ յիշեցուց, որ կառավարութեան աշխատանքային ծրագիրը յստակօրէն կը խօսի բանակին զէնքի գործածութեան մենաշնորհ տալու մասին: «Բոլորը համաձայն են այս որոշումին եւ որեւէ կողմ հակառակ ուղղութեամբ չ’աշխատիր», ըսաւ Սալամ ու դիտել տուաւ, թէ ոչ պետական կողմերու ապազինումը մէկ գիշերուայ մէջ կարելի չէ իրականացնել: «Իսրայէլ հարաւի մէջ Հըզպալլայի զէնքը որպէս պատրուակ բռնած է շարունակելու համար իր օրինախախտումները եւ միջազգային հովանաւորութեամբ կնքուած պայմանաւորուածութիւններու ոտնակոխումը», ըսաւ Սալամ՝ պահանեջելով, որ բռնագրաւող ուժերը անյապաղ դուրս գան սահմանամերձ շրջաններէն եւ ամբողջացնեն Լիբանանէն նահանջը: «Մենք այդ ուղղութեամբ կը փորձենք բանեցնել արաբական եւ միջազգային ճնշում, իսկ հողերու ազատագրութեան միակ պատասխանատուն պետութիւնն է», հաւաստիացուց վարչապետը:
Սալամի յայտարարութիւններուն հակադարձեց շիիներու մուֆթի շէյխ Ահմատ Քապալան ու շեշտեց, որ «Սալամ վարչապետն է երկրի մը, որուն կէսը ազատագրուեցաւ Դիմադրութեամբ, որ կը շարունակէ պաշտպանել երկրին գերիշխանութիւնը»: Ըստ մուֆթիին, Լիբանանի գոյութիւնը կախեալ է Դիմադրութեան զոհողութիւններէն, ուստի Դիմադրութեան ջնջումը կ’անցնի Լիբանանի ջնջումէն: «Եթէ վերջին պատերազմին զոհողութիւններ չըլլային եւ թշնամի բանակը պարտութիւն չկրէր Խիամի մուտքին, այսօր Լիբանան, մայրաքաղաք, գերիշխանութիւն եւ անկախութիւն մնացած չէր ըլլար», համոզում յայտնեց Քապալան:
