«Կանանց Միջազգային Օր»-ուան առիթով, ՀԲԸՄ Լիբանանը, Լիբանանի Ամերիկեան համալսարանի Արաբ կիներու հիմնարկին (LAU AiW) հետ համատեղ, կազմակերպեց
«Համագործակցութիւն՝ փոփոխութիւններու արագացման նպատակով համաշխարհայնացումէն դէպի տեղական» խորագիրով սեմինար մը: Ձեռնարկը տեղի ունեցաւ Կանանց Միջազգային տօնին առիթով, Երկուշաբթի, 3 Մարտ 2025-ին, Լիբանանի Ամերիկեան համալսարանի Irwin Hall, Faculty Lounge-ին մէջ, աւելի քան 55 հոգիներու ներկայութեան:
Քննարկման մասնակցեցան նշանաւոր բանախօսներ, փաստաբաններ ու համայնքային ղեկավարներ, որոնք անդրադարձան սեռային հաւասարութեան համաշխարհային քաղաքականութեան եւ անոր տեղական խոչընդոտներուն յաղթահարման միջոցներուն: Քննարկումը վարեց Արաբ կիներու հիմնարկին տնօրէնուհի Միրիամ Սֆէյր՝ շեշտելով գործընկերութան անհրաժեշտութիւնը՝ տեղական մակարդակի վրայ շօշափելի փոփոխութիւններ բերելու նպատակով:
Ֆինլանտացի դեսպան Աննէ Մեսկանենը խօսեցաւ Ֆինլանտայի սեռային հաւասարութեան զարգացման մասին, շեշտելով համայնքային ներգրաւուածութիւնը:
Լիբանանի խորհրդարանի անդամ Հալիմա Քաաքուր՝ հանրային միջազգային իրաւունքներու դասախօս, անդրադաձաւ սեռային զգայուն քաղաքականութեան ներդրումի ու օրէնսդրական բարեփոխումներու կարեւորութեանց:
Ատէլ Խոտր, երեխաներու իրաւունքներու պաշտպան եւ ԵՈՒՆԻՍԵՖ-ի Միջին Արեւելքի ու Հիւսիսային Ափրիկէի տարածաշրջանի նախկին տնօրէն, անդրադարձաւ հակամարտութենէն տուժած կիներու եւ երեխաներու իրաւունքներուն առնչուող հարցերուն:
Այման Մհաննա լուսարձակեց սեռային հաւասարութեան դէմ աճող հակազդեցութեան վրայ, մասնաւորապէս ծայրայեղ աջ շարժումներու կողմէ առցանց հարթակները զինելու միջոցով: Ան ընդգծեց լրատուական միջոցներու ներգրաւման կարեւորութիւնը՝ կարենալ ապահովելու ներառական ու հաւասարակշռուած տեղեկատուութիւն:
ՀԲԸՄիութեան Լիբանանի Շրջանակային յանձնաժողովի վարիչ-տնօրէնուհի Արին Ղազարեան իր խօսքին մէջ նշեց, թէ հաստատուն եւ իմաստալից փոփոխութեան հասնիլ կարենալու համար անհրաժեշտ է համագործակցութիւն հաստատել տարբեր ոլորտներու միջեւ:
Քննարկումը դրսեւորեց աշխոյժ ու եռանդուն փոխանակում ոլորտի նշանաւոր գործիչներուն միջեւ, անդրադառնալով Լիբանանի եւ աւելի լայն տարածաշրջանին առջեւ ծառայած սեռային հիմնախնդիրներուն:
Եզրափակելով, Միրիամ Սֆէյր կոչ ուղղեց շարունակելու համագործակցութիւնն ու ժողովրդական ներգրաւուածութիւնը՝ սեռային հաւասարութեան հասնելու նպատակով: Ան շեշտեց, որ փոփոխութիւնը կը պահանջէ համբերութիւն, սակայն իւրաքանչիւր նոր լուծում նոր հնարաւորութիւններ կը ստեղծէ:
Նշենք, թէ այս միջոցառումը ՀԲԸՄ Լիբանանի ու AiW-ի չորրորդ համագործակցութիւնն է, վերահաստատելով միատեղ նուիրուածութիւնը ներառական եւ արդար հասարակութիւններու զարգացման ծիրէն ներս:
Ձեռնարկին աւարտին, առիթ տրուեցաւ ներկաներուն իրենց հարցադրումները կատարելու:
