Համաս շարժումի քաղաքական գրասեակի տեղեկատուական հարցերու խորհրդական Թահէր էլ-Նունու յայտնեց, որ Համաս չէ բացառած բանակցութեան հնարաւորութիւնը, թէեւ Իսրայէլ անցնող օրերուն վերսկսած է հարուածել Կազան՝ խախտելով զինադադարի համաձայնութիւնը: Ան միջազգային միջնորդներուն կոչ ուղղեց Իսրայէլէն պահանջելու, որ գործադրեն զինադադարի համաձայնութեան բոլոր կէտերը: «Նոր համաձայնութիւններու կարիք չկայ, որովհետեւ գոյութիւն ունի բոլոր կողմերուն ստորագրութիւնը կրող զինադադարի պայմանաւորուածութիւն», ըսաւ Էլ-Նունու, պահանջելով որ Իսրայէլ գործադրէ համաձայնութեան երկրորդ փուլը:
