Լիբանանի հարաւային սահմանի դրութիւնը, ներլիբանանեան զարգացումները եւ Գերմանիոյ հետ յարաբերութիւնները երէկ հանրապետութեան նախագահ Ժոզէֆ Աուն քննարկեց Պաապտայի պալատ այցելած Գերմանիոյ արտաքին գործերու նախարար Անալենա Պերպոքի հետ: Աուն շեշտեց, որ բարեկարգումները միայն միջազգային պահանջ չեն, այլ՝ լիբանանեան անհրաժեշտութիւն: Աուն ահազանգեց, թէ հարաւի սահմանային հինգ բլուրներուն իսրայէլեան բռնագրաւումը կը խոչընդոտէ 1701 բանաձեւի եւ զինադադարի համաձայնութեան գործադրութիւնը, բողոքելով, որ «իսրայէլեան կողմը մերժած է հինգ բլուրներէն քաշուելու լիբանանեան բոլոր առաջարկները», ըսաւ նախագահը եւ յիշեցուց, թէ տակաւին կան լիբանանցի գերիներ, որոնք տուն չեն վերադարձած: Գերմանացի նախարարը վերահաստատեց բարեկարգումներ մշակելու եւ գործադրելու կարեւորութիւնը, աւելցնելով որ Պեռլին հետաքրքրուած է Լիբանանի հարաւային եւ հիւսիսարեւելեան սահմանային դրութեամբ:
Իսկ վարչապետ Նաուաֆ Սալամ գերմանացի նախարարին հետ տեսակցութեան ընթացքին պահանջեց, որ միջազգային ընտանիքը ստեղծէ հարաւէն տեղահանուած քաղաքացիներու տունդարձին, ինչպէս նաեւ սուրիացի տեղահանուածներու հայրենադարձութեան յարմար պայմանները: «Կայունութեան ամրապնդումը կը սկսի հարաւէն», ըսաւ Սալամ, պահանջելով նպաստել Լիբանանի վերակառուցումի եւ տնտեսական աշխուժութիւնը վերականգնելու ջանքերուն: Պերպոք, միւս կողմէ, Պեռլինի աջակցութիւնը յայտնեց Լիբանանին՝ մանաւանդ տնտեսական եւ ընկերային ծրագրերու իրականացումին համար, հաւաստիացնելով որ իրենք պիտի շարունակեն օգնել լիբանանեան բանակին եւ ազդեցիկ ներկայութիւն ունենալ ԵՈՒՆԻՖԻԼ-ի խաղաղապահ ուժերուն մէջ:
