Լիբանանի հիւսիսարեւելեան Հըրմէլ գաւառի սահմանային հատուածին վիճակը երէկ զգուշաւոր հանդարտ էr՝ անցեալ Կիրակի օր սկսած եւ երեք օր տեւած զինեալ բախումներէն ետք, որոնց մասնակցեցան լիբանանեան եւ սուրիական զինեալ խմբաւորումներ: Լիբանանեան կողմը սուրիացի զինեալները կ’ամբաստնէ սահմանը խախտելու եւ լիբանանեան սահմանային գիւղեր մտնելով քաղաքացիներ սպաննելու մէջ, մինչ սուրիական իշխանութիւնը կը պնդէ, թէ միջադէպին պատասխանատուն Հըզպալլան է, որ կրակ բացած է սուրիական հողերուն ուղղութեամբ, սպաննելով երեք զինուոր: Քաղաքական եւ զինուորական բարձր մակարդակի հաղորդակցութիւններէ ետք, լիբանանեան բանակը երէկ դիրքաւորուեցաւ սահմանային Հաուշ Սեյիտ Ալի գիւղի լիբանանեան հատուածին մէջ, իսկ սուրիական ուժերը տեղակայուեցան գիւղի սուրիական հատուածին մերձակայքը՝ հնարաւորութիւն տալով իրենց տուները լքած գիւղացիներու ապահով տունդարձին: Լիբանանեան բանակը անցարգելներ հաստատեց եւ շրջուն ջոկատներով շրջագայեցաւ գիւղին մէջ եւ վնասազերծեց չպայթած ռումբերը:
Սուրիական բանակի 52-րդ զօրախումբի հրամանատարներէն մէկը յայտնեց, թէ Պաշտպանութեան նախարարութենէն պաշտօնատար մը հաղորդակցած է լիբանանեան բանակի իր պաշտօնակիցին հետ եւ համաձայնած, որ թէ՛ լիբանանեան, թէ՛ սուրիական զինուած ուժերը հեռանան սահմանային այդ հատուածէն ու տեղակայուին գիւղին մօտակայքը՝ առիթ տալով քաղաքացիներու անվտանգ տունդարձին եւ կայունութեան վերականգնումին: Սուրիացի հրամանատարը սակայն զգուշացուց, թէ «Հըզպալլայի կողմէ այս համաձայնութեան որեւէ խախտում պիտի արժանանայ կտրուկ եւ առանց զգուշացումի հակադարձութեան»:
Հանրապետութեան նախագահ Ժոզէֆ Աուն հետեւեցաւ սահմանային զարգացումներուն եւ հաղորդակցեցաւ բանակի հրամանատար զօրավար Ռուտոլֆ Հայքալի հետ՝ դրուատելով զինուորներուն ներդրած ջանքը՝ շրջանին կայունութիւնն ու անվտանգութիւնը վերականգնելու ուղղութեամբ:
