Չորեքշաբթի, 13 Մարտ 2025-ին , Ս.Դ.Հ.Կ. Լիբանանի շրջանի նորընտիր Վարիչ մարմինը, գլխաւորութեամբ ատենապետ ընկ. Վանիկ Տագէսեանի, պաշտօնական այցելութիւն մը տուաւ Արամ Ա. վեհափառ հայրապետին, Անթիլիասի մայրավանքին մէջ:
Ընկեր Տագէսեան նորընտիր վարիչ մարմինի կազմը ներկայացուց Վեհափառ հօր։
Ս.Դ.Հ.Կ.-ի պատուիրակութիւնը լսելէ ետք Վեհափառ հօր յորդորները, քննարկեց Լիբանանը եւ լիբանանահայութիւնը յուզող հարցերը, մանաւանդ յառաջիկային տեղական ինքնակառավարման եւ պետական երեսփոխանական ընտրութիւններու լոյսին տակ: Արամ Ա. կաթողիկոս ցանկութիւն յայտնեց, որ հայ համայնքը միացեալ իր իրաւունքները լիովին ձեռք բերած դուրս գայ այս ընտրութիւններէն։
Տարաբնոյթ հարցերու շարքին շեշտուեցաւ մարդուժի կարեւորութիւնը, ընդգծելով Վեհափառին հռչակած «աւանդութիւններու կենսագործման» անհրաժեշտութիւնը: Վեհափառ Հայրապետն ու Վարիչ մարմինի անդամները համոզում յայտնեցին, որ Լիբանանի նոր նախագահ Ժոզէֆ Աունի ընտրութիւնն ու նոր վարչապետ Նաուաֆ Սալամի նշանակումը դրական ազդեցութիւն թողած են ընդհանուր վիճակին վրայ եւ դրական լիցք մը տուած են Լիբանանի ժողովուրդին:
Ն.Ս.Օ.Տ.Տ. Արամ Ա. վեհափառ հայրապետը, իր հայրական օրհնութիւնները փոխանցելէ ետք, յաջողութիւն մաղթեց Ս.Դ.Հ.Կ.-ի Լիբանանի շրջանի նորընտիր Վարիչ մարմինի անդամներուն եւ իր աջակցութիւնը յայտնեց անոր՝ գալիք երկամեայ գործունէութեան:
