ՄԱԿ-ի Ապահովութեան խորհուրդը արտակարգ նիստով մը քննարկեց Սուրիոյ արեւմտեան ծովեզերեայ շրջաններուն մէջ տեղի ունեցող իրադարձութիւնները եւ Դամասկոսի նոր իշանութիւններէն պահանջեց հակակշիռի տակ առնել կացութիւնն ու վերջ տալ յարանուանական բռնութիւններուն: Ապահովութեան խորհուրդը Սուրիոյ ղեկավարութենէն պահանջեց նաեւ պայքարիլ Սուրիոյ մէջ աշխուժացած օտարազգի զինեալներու երեւոյթին դէմ:
Իսրայէլեան բանակը յայտարարեց, թէ օդուժը թիրախաւորած է Դամասկոսի մէջ պաղեստինեան Ժիհատ շարժումին պատկանող դիրքերէն մէկը: «Չենք արտօներ, որ ահաբեկչական կազմակերպութիւնները դիրքաւորուին Սուրիոյ հողին վրայ եւ գործողութիւններու ձեռնարկեն մեր դէմ», յայտարարեց իսրայէլեան բանակը:
